Nauðsynlegt að þrýsta á Rússa um að samþykkja vopnahlé

Sæki samantekt...

Volodymyr Zelensky Úkraínuforseti segir samkomulag um vopnahlé hafa verið allt of lengi á borðinu án þess að viðunandi viðbrögð hafi fengist frá Rússum. Ef þrýst hefði verið á Rússa fyrir alvöru væri mögulega búið að lýsa yfir vopnahléi. Þetta sagði Zelensky á samfélagsmiðlinum X í gærkvöld.

Hann kvaðst þakklátur þeim ríkjum sem hefðu áttað sig á stöðunni og mælt fyrir auknum viðskiptaþvingunum gegn Rússlandi.

Rússar og Úkraínumenn sögðust í liðinni viku reiðubúnir að samþykkja vopnahlé á Svartahafi. Rússar segja hins vegar að vopnahlé geti ekki tekið gildi fyrr en ákveðnum viðskiptaþvingunum gegn þeim verði aflétt.

Donald Trump Bandaríkjaforseti kvaðst í kosningabaráttu sinni geta bundið enda á stríðið á örskotsstundu. Þrátt fyrir að Bandaríkjastjórn hafi rætt við ráðamenn beggja ríkja að undanförnu hefur lítið áunnist í friðarátt.

Rússnesk stjórnvöld höfnuðu um miðjan mánuð tillögu að þrjátíu daga vopnahléi í Úkraínu. Vladimír Pútín Rússlandsforseti lagði til fyrir helgi að Zelensky stigi til hliðar og bráðabirgðastjórn yrði skipuð í Úkraínu þar til unnt væri að halda kosningar í landinu.