Ásthildur Lóa upplýsti formennina þrjá um símtöl sín og heimsókn á krísufundinum á fimmtudag

Sæki samantekt...

Forsætisráðherra heyrði af orðrómi skömmu fyrir fund leiðtoga ríkisstjórnarinnar á fimmtudag að fyrrverandi menntamálaráðherra hefði bæði hringt og heimsótt konu í Kópavogi sem sagði ráðherra hafa eignast barn með unglingspilti fyrir rúmum þremur áratugum. Mennta- og barnamálaráðherra gekkst við þessari hegðun á fundi með formönnunum skömmu síðar. Þetta staðfestir forsætisráðuneytið í skriflegu svari við fyrirspurn Spegilsins.

Ráðherrar spurðir út í afsögnina

„Milli okkar fjögurra, formanna flokkanna og umrædds fyrrverandi ráðherra, hefur alltaf ríkt fullkomið traust. Við getum talað saman sem kollegar, sem manneskjur, sem vinkonur og rætt og ráðlagt án þess að taka af henni valdið,“ Þetta sagði Kristrún Frostadóttir, forsætisráðherra, í óundirbúnum fyrirspurnartíma á Alþingi í dag.

Kristrún Frostadóttir forsætisráðherra svaraði spurningum fjölmiðlamanna á föstudag. RÚV/Ragnar Visage

Hún var þarna að svara fyrirspurn Nönnu Margrétar Gunnlaugsdóttur, þingmanns Miðflokksins.“ Var óbreytt mönnun ríkisstjórnarinnar valkostur? Telur hann eitthvað refsivert í málinu? Og settu tvær valkyrjur þrýsting á þá þriðju? ,“ spurði Nanna Margrét.

Bæði Kristrún og Þorgerður Katrín Gunnarsdóttir, utanríkisráðherra, voru á Alþingi í dag mikið spurðar um fund leiðtoga ríkisstjórnarinnar á fimmtudag með Ásthildi Lóu og hvaða kostum hefði verið velt upp á þeim fundi.

Engin frétt birst fyrir krísufund leiðtoga

Samkvæmt upplýsingum frá forsætisráðuneytinu ræddu Kristrún, Þorgerður Katrín og Inga Sæland saman í um hálfa klukkstund áður en Ásthildur Lóa gekk á fund þeirra.

Þá hafði engin frétt verið sögð eða birt af máli Ásthildar, það sem ráðherrarnir vissu var tvennt: annars vegar að um morgunin hafði örstutt fyrirspurn borist frá fréttamanni RÚV í símtali til aðstoðarmanns forsætisráðherra þar sem spurst var fyrir um erindi sem varðaði Ásthildi Lóu.

Og hins vegar að í forsætisráðuneytinu lá fyrir erindi frá konu í Kópavogi sem misbauð að í sæti barnamálaráðherra væri kona sem hefði átt í ástarsambandi við unglingspilt fyrir rúmum þremur áratugum og eignast með honum son — faðirinn var á 17 aldursári, Ásthildur að verða 24 ára.

Lögðu áherslu á að ákvörðunin væri Ásthildar Lóu

Konan hélt því einnig fram að ráðherrann hefði á sínum tíma tálmað umgengni föðurins við barnið — ásökun sem ráðherrann hefur hafnað. „Ákvörðun fyrrverandi mennta- og barnamálaráðherra er algjörlega hennar. Að sjálfsögðu var farið yfir það á þessum fundi, á fimmtudaginn var farið yfir málið og hún gerði grein fyrir atburðarásinni. Ákvörðunin er síðan hennar,“ sagði Þorgerður Katrín Gunnarsdóttir, utanríkisráðherra.

Þorgerður Katrín Gunnarsdóttir utanríkisráðherra á Bessastöðum eftir ríkisráðsfund. RÚV/Bragi Valgeirsson

Þegar Ásthildur Lóa gekk á fund ráðherranna þriggja upplýsti hún um málið frá sínu sjónarhorni. Það sem hefur ekki komið fram er að forsætisráðherra hafði skömmu fyrir fundinn borist orðrómur þess efnis að Ásthildur Lóa hefði hringt og heimsótt konuna eftir að hafa fengið upplýsingar um hana frá aðstoðarmanni forsætisráðherra. Þetta staðfestir ráðuneytið í svari til Spegilsins.

Þar er líka staðfest að Ásthildur var aldrei upplýst um að forsætisráðuneytið hefði hafnað beiðni konunnar um fund með forsætisráðherra. Og samkvæmt svörum forsætisráðuneytisins staðfesti Ásthildur Lóa hegðun sína á fundinum með formönnunum þremur.

Forsætisráðherra ósáttur við heimsókn og símtöl Ásthildar

Það mátti glöggt heyra á forsætisráðherra í óundirbúna fyrispurnartímanum að hún var mjög ósátt við þessa framgöngu Ásthildar Lóu.

Fyrst þegar hún svaraði fyrirspurn frá Guðrúnu Hafsteinsdóttur formanni Sjálfstæðisflokksins. „Ég held að það liggi alveg fyrir og ég hef sagt það sjálf opinberlega, og Ásthildur Lóa Þórsdóttir er meðvituð um það, að það voru til að mynda ekki eðlileg viðbrögð hjá henni að ákveða að banka upp á hjá umræddri konu. Ég held að það geti allir tekið undir að það er ekki eðlileg hegðun af hálfu ráðherra í þessu samhengi. Þannig að það eitt og sér finnst mér umhugsunarvert hjá manneskju í slíkri stöðu. Hún áttaði sig á því og var líka meðvituð um það.“

Guðrún Hafsteinsdóttir, formaður Sjálfstæðisflokksins. RÚV/Ragnar Visage

Þetta ítrekaði Krisrún síðan þegar hún svaraði fyrirspurn Hildar Sverrisdóttur, þingflokksformanns Sjálfstæðisflokksins.“ Það hefur enginn haldið því fram að það hafi verið eðlileg hegðun. […] Umræddur aðili áttar sig á því að það er margt við þetta mál sem gerir það að verkum að það þykir mögulega ekki eðlilegt að hún sitji áfram sem ráðherra og hún hefur axlað ábyrgð.“

„Snýst um ráðhera sem sat og gerði ekkert“

Samkvæmt svörum frá forsætisráðuneytinu lauk fundi formannanna þriggja og Ásthildar Lóu klukkan sautján tíu-þaðan hélt ráðherrann upp í Efstaleiti í viðtal við fréttamann RÚV, búin að ákveða afsögn sína.

Þorgerður Katrín sagðist á Alþingi vona að hægt yrði draga einhvern lærdóm af málinu, Formaður Sjálfstæðisflokksins sagði þetta snúast um forsætisráðherra sem ekki hefði gert neitt annað en að hafna beiðni um fund og ýta ráðherra í farveg afsagnar.“ Ef forsætisráðherra taldi málið svo alvarlegt að það réttlætti afsögn ráðherrans, hvers vegna gerði forsætisráðherra ekkert í heila viku? Var þetta vanmat á alvöru málsins eða von um að það gengi yfir án frekari umræðu? Þetta snýst ekki lengur um ráðherrann sem vék, þetta snýst um ráðherrann sem sat og gerði ekkert.“