Laun formanns SÍS nær þrefaldast á tveimur árum

Sæki samantekt...

Laun fyrir formennsku í Sambandi íslenskra sveitarfélaga hafa nær þrefaldast á tveimur árum. Morgunblaðið greinir frá þessu.

Launin nema 762.921 krónu, auk ökutækjastyrks upp á 105.750 krónur. Heildarlaun eru því 868.671 króna á mánuði. Nemur hækkunin 170% á tímabilinu — þ.e. launin hafa 2,7 — faldast.

Morgunblaðið greinir frá því að á síðasta ári hafi verið samþykktar nýjar reglur um að laun formannsins miðist við helming þingfararkaups. Í svari Sambands íslenskra sveitarfélaga við fyrirspurn blaðsins kemur fram að fundum stjórnar hafi verið fjölgað úr einum í tvo á mánuði.

Heiða Björg Hilmisdóttir borgarstjóri hefur verið formaður Sambands íslenskra sveitarfélaga frá árinu 2022. Áður hefur verið greint frá því að hún fái laun frá Sambandinu ofan á laun fyrir borgarstjórastarfið og nema samanlögð laun hennar því rúmum 3,8 milljónum króna.