Laun Heiðu Bjargar hafi hækkað um 50 prósent á tveimur árum, ekki 170 prósent

Sæki samantekt...

Samband íslenskra sveitarfélaga vísar því á bug að kjör formanns sambandsins, Heiðu Bjargar Hilmisdóttur borgarstjóra, hafi hækkað um 170 prósent á tveimur árum eins og Morgunblaðið hefur greint frá eða úr 285.087 krónum í byrjun árs 2023 en nú eru launin 762.921 króna.

Sambandið segir þetta ekki rétt eins og kemur fram í fréttatilkynningu frá sambandinu til fjölmiðla sem send var út í morgun.

Í tilkynningunni kemur fram að launakerfi sambandsins hafi verið breytt fyrir tæplega tveimur árum síðan og það hafi valdið misskilningi. Samkvæmt

„Fyrir breytingarnar hlaut formaður tvöföld stjórnarlaun fyrir setu í stjórn auk yfirvinnugreiðslna, sem voru að jafnaði 40 yfirvinnutímar á mánuði. Þessar yfirvinnugreiðslur voru hins vegar ekki teknar saman í þær tölur sem Sambandið sendi frá sér upphaflega og gefa því ekki rétta mynd af heildarkjörum formanns áður en breytingarnar voru gerðar.

Frá og með árinu 2024 er engin yfirvinna greidd fyrir aukavinnu eða aukafundi. Formanni er greidd föst upphæð sem nemur 50% af þingfararkaupi, enda er um umfangsmikið starf að ræða,“ segir í tilkynningunni.

Aukið vinnuálag

Þá kemur fram að mikil aukning hafi verið í fundarhöldum stjórnar sambandsins undanfarin ár.

„Mikil aukning hefur orðið í fundarhöldum stjórnar Sambandsins undanfarin ár. Áður voru um 10–11 fundir haldnir á ári, en árið 2023 voru þeir 24, árið 2024 voru þeir 20, og nú þegar hafa 11 fundir farið fram á þessu ári. Gert er ráð fyrir að fundir á árinu 2025 verði um 26.

Til viðbótar við stjórnarfundi fundar formaður reglulega með starfsfólki Sambandsins, sem og með bæjarstjórum og fulltrúum sveitarfélaga um land allt. Formaður situr einnig einnig fjöldan allan af ráðstefnum þar sem flutt eru ávörp í nafni Sambandsins. Að auki á formaður sæti í Þjóðhagsráði og Samstarfsráði ríkis og sveitarfélaga, þar sem unnið er að stefnumálum sveitarfélaga,“ segir í tilkynningunni.

Þá hafi nýtt skipurit verið innleitt þar sem samninganefnd var færð beint undir stjórnina, sem á að hafa aukið vinnu stjórnar og formanns við kjarasamningsgerð.

Breytt umgjörð og aukin starfsemi Sambandsins

„Tillaga að breyting á kjörum stjórnar og formanns var lögð fram af starfskjaranefnd og samþykkt í stjórn Sambandsins. Starfskjaranefnd tók allt framangreint til greina inn í sína tillögu. Mat starfskjaranefndar var að vinna formanns Sambandsins samsvari um 50% starfi. Það er því ekki rétt að laun formanns hafi hækkað um 170% frá árinu 2023. Sambandi íslenskra sveitarfélaga þykir miður að rangar upplýsingar hafi farið út um kjör formanns á árunum 2022–2023 og biðst innilegrar velvirðingar á því,“ segir í tilkynningunni.

Mikil umræða hefur verið um heildarlaun Heiðu Bjargar borgarstjóra en greint var frá því að þau námu rúmlega 3,8 milljónum króna á mánuði. Augu gagnrýnenda hafa sérstaklega beinst að áðurnefndu formannsembætti hennar á Sambandi íslenskra sveitarfélaga og þeirri hækkun sem hefur orðið á þeim kjörum undanfarin ár.