Telur að ekki sé þörf á að beita hervaldi

Sæki samantekt...

J.D. Vance, varaforseti Bandaríkjanna, sakar Danmörku um að hafa vanrækt skyldur sínar í að vernda Grænland. Þá sé ekki þörf á að Bandaríkin beiti hervaldi til að ná Grænlandi á sitt vald.

Vance lenti í Grænlandi fyrr í dag, þar sem hann heimsótti bandarísku Pituffik-geimherstöðina (e. Space Base) á norðvesturhluta eyjarinnar.

Telur Trump geta gert samning við Grænland

„Skilaboð okkar til Danmerkur eru einföld: Þið hafið ekki sinnt fólkinu á Grænlandi nægilega vel. Þið hafið fjárfest of lítið í fólki Grænlands og öryggisuppbyggingu þessa ótrúlega og fallega lands,“ sagði Vance á blaðamannafundi sem haldinn var í herstöðinni.

Vance telur jafnframt að hervald verði ekki nauðsynlegt til að Bandaríkin nái yfirráðum yfir Grænlandi en Donald Trump, forseti Bandaríkjanna, hefur ekki útilokað þann möguleika.

„Við teljum ekki að hervald verði nokkurn tíma nauðsynlegt. Við teljum þetta skynsamlegt,“ sagði Vance og bætti við að hann teldi Trump geta gert samning við Grænland um yfirtöku.