Atvinnuvegaráðherra segir einfalt að koma í veg fyrir að eina hveitimyllan hætti að mala

Sæki samantekt...

Atvinnuvegaráðherra segir að ef sótt yrði aftur um starfsleyfi fyrir einu hveitimyllu landsins ætti leyfið að fást þar sem lögum hafi verið breytt. Mikilvægt sé að halda myllunni í þágu fæðuöryggis þjóðarinnar.

Til stendur að loka einu hveitimyllu landsins um mánaðamótin. Kornax hefur rekið hana í Sundahöfn í Reykjavík í fjörutíu ár en Faxaflóahafnir sem eiga húsnæðið hafa sagt leigusamningnum upp. Kornax rekur fóðurverksmiðju á Grundartanga og sótti um leyfi til að reka mylluna þar en því var hafnað því of stutt væri í mengandi starfsemi, innan þynningarsvæðis.

Sérfræðingur í fæðuöryggi sagði í fréttum RÚV að rekstur myllunnar væri þjóðaröryggismál því með því að flytja inn ómalað hveiti væri hægt að tryggja betur fæðuöryggi þjóðarinnar.

„Já, ég get alveg tekið undir það. Það skiptir máli að við séum hér með raunverulega vinnslu hveitisins vegna þess að endingartíminn er lengri og það er eitt af púslunum í þessari mynd sem að aukið fæðuöryggi okkar er og verið er að vinna að,“ segir Hanna Katrín Friðriksson atvinnuvegaráðherra.

Synjun heilbrigðiseftirlitsins ekki á réttum forsendum

„Hvað varðar þetta tiltekna mál og starfsleyfi Líflands eða Kornax þá er málum einfaldlega þannig háttað að við í ráðuneytinu teljum að synjun Heilbirðigseftirlits hafi ekki verið á réttum forsendum og í öllu falli þá er þetta þynningarákvæði nú farið út úr lögum um umhverfisvernd. Þannig að ég myndi ætla að nærtækasta leiðin væri fyrir fyrirtækið að sækja einfaldlega um starfsleyfi aftur á núgildandi lögum og það ætti að ganga í gegn,“ segir Hanna Katrín.

Hveitikorn. RÚV/Kristinn Þeyr

Þar með ætti að vera hægt að reka mylluna áfram, en í henni eru tíu þúsund tonn möluð árlega. Ráðherra sagði hvorki ráðuneytið né Matvælastofnun hafa boðvald yfir Heilbrigðiseftirliti Vesturlands.

„En þegar rýnt er í lögin og hvaða ákvæði var vísað í þegar umsókninni var synjað á sínum tíma þá er það ákvæði horfið úr lögum. Það ætti að vera mjög nærtækt og það er þá til vara sú leið að ef að kemur synjun aftur að kæra það þá til Matvælastofnunar, en bara gæta þess að vera innan tiltekins frests og þá er hægt að vinna málið áfram. En ég tel, eins og ég hef séð þetta og fengið ráðgjöf um, að það ætti að ganga í gegn starfsleyfið ef sótt er um núna.“