Nýir tollar Trump: Gullöldin runnin upp?

Sæki samantekt...

Donald Trump Bandaríkjaforseti kynnti í kvöld nýja tolla á vörur sem eru fluttar inn til Bandaríkjanna á blaðamannafundi í Hvíta húsinu.

Á blaðamannafundi í Hvíta húsinu hélt forsetinn 50 mínútna langa ræðu og fór þar um víðan völl. Sagði hann hinar ýmsu þjóðir lengi hafa notfært sér Bandaríkin með ósanngjörnum fyrirkomulögum og raunar rænt þau. Nú væri aftur á móti tími til að Bandaríkin blómstruðu á ný og settu þjóðunum fótinn fyrir dyrnar. Gullöld Bandaríkjanna væri runnin upp.

„2. apríl 2025 verður ávallt minnst sem dagsins sem bandarískur iðnaður endurfæddist, dagsins sem örlög Bandaríkjanna voru endurheimt og dagsins sem við byrjuðum að gera Bandaríkin auðug á ný,“ sagði Trump.

10% tollar á Ísland

Tilkynnti forsetinn að frá og með miðnætti myndi hann leggja 25% tolla á innflutning allra erlendra bíla.

Þá tilkynnti hann að 10% lágmarkstollur yrði í gildi fyrir öll lönd en að hann hygðist innleiða „gagnkvæma tolla“ á aðrar þjóðir. Aðstoðarmaður utanríkisráðherra staðfesti við fréttastofu að tollar á innflutningsvöru frá Íslandi verði 10%. Ísland er ekki í tollabandalagi með aðildarríkjum Evrópusambandsins, en þau eru hluti af innri markaðnum á Evrópska efnahagssvæðinu.

Þorgerður Katrín Gunnarsdóttir utanríkisráðherra sagði í samtali við fréttastofu að ráðuneytið muni funda með fulltrúum atvinnulífsins strax í fyrramálið til að fara yfir stöðuna. Ekki sé ákjósanlegt að verið sé að leggja tolla á vinaþjóðir. Hún sýni ákvörðun Trumps virðingu en hafi orðið fyrir ákveðnum vonbrigðum.

„Gagnkvæmir tollar með afsláttum“

Innflutningsvörur frá Evrópusambandinu munu aftur á móti sæta 20% tolli. Trump dró fram stærðarinnar skilti með lista yfir tolla landanna og mátti þar sjá að sum lönd þurfa að sæta hátt í 50% tollum.

Á listanum er tekið fram að tollarnir séu gagnkvæmir en með afslætti og séu því aðeins helmingur af þeim tollum og viðskiptahindrunum sem löndin sjálf leggi á bandarískar vörur.

Er það til að mynda mat Bandaríkjastjórnar að Kína leggi 67% tolla- og viðskiptahindranir á vörur frá Bandaríkjunum. Bandaríkin muni í staðinn leggja 34% tolla á Kína. Aðrar þjóðir á borð við Kambódíu og Laos þurfa að greið hátt í 50% tolla.