Segja þrefaldan Vestfjarðaskatt í fjármálaáætlun

Sæki samantekt...

Í fjármálaáætlun fyrir 2026–2030 sem ríkisstjórnin kynnti í vikunni eru þrjár skattkerfisbreytingar sem Fjórðungssambandið telur koma hlutfallslega mjög illa niður á Vestfjörðum.

Gylfi Ólafsson, formaður Fjórðungssambands Vestfjarða, segir þar fyrsta að nefna breytingar á veiðigjaldi sem komi illa við smáar útgerðir sem margar hafi barist í bökkum.

„Númer tvö er hækkun á laxeldisgjaldi umfram það sem ákveðið hafði verið,“ segir Gylfi. „Það á að hækka það upp í 5% af alþjóðlegum markaði.“

Sú þriðja er innviðagjald á skemmtiferðaskip sem tók gildi um áramót. Nýlega var tilkynnt að hún yrði ekki endurskoðuð.

Fjórðungsþing vill að ríkið endurskoði áformin

Fjórðungsþing Vestfirðinga samþykkti í gær ályktun um að lýsa miklum áhyggjum af þessum breytingum á gjaldtöku. Í ályktuninni segir jafnframt: „Þessir þættir, auk kílómetragjalds, kolefnisgjalds og óvissu í tengslum við flug til Ísafjarðar, eru til þess fallnir að draga úr samkeppnishæfni atvinnulífs og sveitarfélaga á Vestfjörðum.“

Gylfi gagnrýnir að litið sé á skemmtiferðaskip og laxeldi sem óþrjótandi auðlind sem hægt sé að rukka um hvað sem er. Hann bendir á að Vestfirðir séu útflutningsdrifið hagkerfi sem megi illa við óvissu og hækkunum.

Þá búi Vestfirðir við erfiðar vetrarsamgöngur. Ferðaþjónusta reiði sig þeim mun meira á komur skemmtiferðaskipa.

Höfuðborgin ekki skattlögð á sama hátt

„Varðandi veiðigjöldin þá má kannski segja að við séum í skotlínunni í hráskinnaleik ríkisins gegn stórútgerðinni þar sem litlu og meðalstóru útgerðirnar sem eru hérna þónokkrar geta komið mjög illa út úr því,“ sagði Gylfi.

„Við sjáum ekki að það sé verið að gera sambærilegar skattkerfisbreytingar sem snúa að höfuðborgarsvæðinu. Þetta á eftir að hafa mjög slæm áhrif á Vestfirði og setur margvíslega uppbyggingu í óvissu,“ segir Gylfi.