Fékk áfall þegar hún sá hvað eins árs sonur hennar var að borða - „Þegar sonur þinn borðar pabba þinn“

Sæki samantekt...

Móðir ein í Lincoln á Englandi viðurkennir að hún hafi fengið vægt áfall þegar hún kom að eins árs syni sínum og sá hvað hann var að gera.

Sá stutti hafði komist í duftker sem innihélt ösku látins afa hans og var hann að leika sér með hana þegar móðir hans, Natasha Emery, kom að honum.

Natasha reif upp símann þegar hún kom að syni sínum og birti hún myndband af atvikinu á TikTok. Yfirskrift myndbandsins hefur fengið einhverja til að brosa út í annað: „Þegar sonur þinn borðar pabba þinn.“

Natasha hafði brugðið sér frá í eitt augnablik til að setja í þvottavélina og er óhætt að segja að snáðinn, Koah, hafi nýtt tímann til hins ýtrasta.

Duftkerfið var uppi á hillu og virðist Koah hafa beitt einhverri áður óþekktri útsjónarsemi til að teygja sig í kerið. Askan var vitanlega komin út um allt; á gólfið, í sófann, í fötin hans og eitthvað rataði upp í munninn á honum.

Natasha segir að því miður hafi Koah aldrei hitt afa sinn og segir að hann hafi verið mikill húmoristi. Honum hefði vafalítið þótt gjörningur barnabarnsins bráðfyndinn ef hann væri á lífi.

Myndbandið hefur fengið gríðarlega mikið áhorf á TikTok en það má sjá hér að neðan.

@palominolil #omg ♬ original sound-Tashjade