Villingavatn til skógræktar

Sæki samantekt...

Hollenska félagið Heartwood Afforested Land ehf. áformar stórfellda skógrækt á jörðinni Villingavatni í Grímsnes- og Grafningshreppi sem er við sunnanvert Þingvallavatn, skammt vestan Úlfljótsvatns.

Jörðin er um 1.700 hektarar að stærð og er ætlunin að rækta skóg á 1.300 hekturum lands, en markmiðið með skógræktinni er sagt kolefnisbinding, trjánytjar og uppgræðsla á röskuðu landi.

Hafa áform þessi verið til umsagnar á vef Skipulagsstofnunar upp á síðkastið og beðið er ákvörðunar stofnunarinnar um hvort framkvæmdin sé matsskyld gagnvart umhverfisáhrifum.

Í lýsingu á verkefninu kemur m.a. fram að ætlunin sé að rækta a.m.k. fjórar tegundir trjáa; alaskaösp, greni, lerki eða furu og birki. Ösp og greni verða þar í aðalhlutverki með samanlagt um 50–60% hlutdeild.

Þessar trjátegundir eru sagðar gjöfular tegundir í skógrækt á Íslandi og að í nærumhverfi Villingavatns séu dæmi um góðan vöxt þessara tegunda. Vaxtarhraði alaskaaspar og grenis er tiltölulega mikill sem þýðir að þær binda kolefni hratt og skapa þ.a.l. verðmætt timbur fyrr en hægvaxta tegundir.

Lesa má meira um málið í Morgunblaðinu í dag og í nýja Mogga-appinu