Leynileg hernaðarskjöl fundust á götu úti í Newcastle

Sæki samantekt...

Rannsókn stendur nú yfir á því af hverju háleynileg hernaðarskjöl enduðu á götu úti í Newcastle á Englandi. Forsætisráðuneytið segir að gripið verði til „viðeigandi ráðstafana“ vegna málsins.

Sky News skýrir frá þessu og segir að skjölin hafi fundist í svörtum ruslapoka í Scotswood í Newcastle um miðjan mánuðinn.

BBC segir að skjölin hafi meðal annars innihaldið upplýsingar um tign hermanna, vaktir þeirra, netföng, vopn og aðgengismál að herstöðvum. Skjölin tengjast Catterick herstöðinni í Yorkshire.

Í yfirlýsingu frá varnarmálaráðuneytinu segir að það telji ekki að stórkostlegur öryggisbrestur hafi átt sér stað en verið sé að rannsaka málið. Engar upplýsingar um aðgerðir hersins hafi verið í skjölunum.