Forsetanum settur dómstóllinn fyrir dyrnar, og þó...

Sæki samantekt...

Alríkisdómari í Bandaríkjunum bannaði Trump-stjórninni að notast við tvö hundruð ára gömul stríðslög til að senda útlendinga úr landi. Þrátt fyrir það sendu Bandaríkin rúmlega 200 meinta glæpamenn til El Salvador í nótt, þar sem þeir eiga að dúsa í einu stærsta fangelsi heims.

Á föstudag gaf Donald Trump út forsetatilskipun þar sem vísað var til lagasetningar frá 1798 með það fyrir stafni að vísa liðsmönnum venesúelska glæpagengisins Tren de Aragua (TdA) úr landi. Sagði Trump Venesúelamennina ógna Bandaríkjamönnum.

Lögin kveða á um að þegar Bandaríkin eru í stríði eða að verja af sér innrás sé yfirvöldum heimilt að handsama og/eða senda úr landi „alla íbúa, borgara eða þegna óvinaþjóðarinnar sem eru 14 ára og eldri“ án málsmeðferðar.

Lögum þessum hefur aðeins verið beitt þrisvar í Bandaríkjasögunni, meðal annars í fyrri og seinni heimstyrjöldinni.

Opinberuðu tilskipunina í gær

Fréttir bárust ekki af tilskipun forsetans fyrr en í gær, þegar ríkisstjórnin opinberaði hana eftir að mannréttindasamtök höfðu stefnt ríkisstjórninni fyrir hönd fimm venesúelskra manna sem átti að vísa úr landi.

Örskömmu síðar setti James E. Boasberg, alríkisdómari í Washington, stólinn fyrir dyrnar og sagði að hann myndi leggja fram tímabundna skipun sem bannaði ríkisstjórninni að notast við löggjöfina til að vísa innflytjendum úr landi. Þetta átti að fresta brottflutningum í að minnsta kosti 14 daga.

New York Times hefur eftir dómaranum að hann trúi ekki að lögin séu grundvöllur fyrir áætlanir forsetans. Hann sagði að öllum þeim sem hefði verið vísað úr landi vegna tilskipunarinnar þyrfti að snúa aftur til Bandaríkjanna, hvernig sem farið væri að því — jafnvel þó að þyrfti að snúa flugvélum við.

„Þetta er eitthvað sem þið verðið að passa upp á að sé framfylgt samstundis,“ sagði Boasberg og beindi orðum til ríkisstjórnarinnar.

Dómsmálaráðuneyti Bandaríkjanna áfrýjaði ákvörðun dómarans strax, að sögn Washington Post, og sakaði Boasberg um átroðning á „valdi framkvæmdavaldsins til að fjarlægja hættulega útlendinga“.

Samt sendir úr landi

Trump-stjórnin virðist ekki hafa framfylgt þessu, þar sem útlendingunum var samt vísað úr landi.

Í dag greindu svo Nayib Bukele, forseti El Salvador, og Marco Rubio, utanríkisráðherra Bandaríkjanna, frá því að 238 meintir TdA-menn hefðu verið sendir til El Salvador þar sem þeir myndu dvelja í fangelsi.

Bandaríkin greiða El Salvador fyrir að taka á móti þeim. Í myndskeiði sem Bukele deildi með sinni færslu má sjá nokkra menn í handjárnum sem fluttir voru úr flugvél yfir í Cecot-fangelsið.

Einnig hafa Bandaríkjamenn sent 23 eftirlýsta meðlimi MS-13 glæpagengisins til El Salvador.

Eitt stærsta fangelsi vesturheims

Trump hafði haldið því fram í tilskipun sinni að TdA-menn stunduðu „óvenjulegan hernað gegn landsvæði Bandaríkjanna, bæði beint og að stefnu Maduro-stjórnarinnar, leynilega eða ekki“ en þar vísar hann til Nicolás Maduro, forseta Venesúela.

Þessum meintu glæpamönnum verður gert að dúsa í einu alræmdasta fangelsi heims, Cecot-fangelsinu.

Fangelsið rýmir 40 þúsund manns og föngum er þar komið fyrir í gluggalausum klefum, gert að sofa á stálrúmum án dýnu, og er þeim meinað að fá gesti.