„Eins og það væri verið að kasta grjóti í rúðuna“

Sæki samantekt...

Íbúum á Völlunum í Hafnarfirði brá heldur betur í brún fyrr í dag þegar haglél sem var um tveir sentimetrar í þvermál, féll af himnum með miklum látum í hverfinu, og eflaust víðar.

Jens Arne Júlíusson, íbúi á Völlunum, segir hefðbundið haglél hafa varað í nokkrar mínútur áður en mikil læti fóru að heyrast.

„Síðan heyrðust ennþá meiri læti eins og það væri verið að kasta grjóti í rúðuna og þegar ég leit út þá voru haglél sem voru tveir sentimetrar í þvermál fyrir utan,“ segir Jens í samtali við mbl.is.

Hann var heima með sex ára dóttur sinni þegar veðrið gekk yfir, og óskaði hún eftir því að fá heyrnahlífar yfir eyrun, svo mikill var hávaðinn.

Jens segir risa haglélið hafa verið glerhart og að það hafi tekið hnullungana yfir klukkutíma að bráðna úti.