Gæti hætt en enn ekki viss

Sæki samantekt...

Rósa Guðbjartsdóttir, þingmaður Sjálfstæðisflokksins og formaður bæjarráðs Hafnarfjarðar, ætlar að sitja áfram í stjórn Sambands íslenskra sveitarfélaga og í bæjarstjórn Hafnarfjarðar um sinn.

Þetta kemur fram á vef Ríkisútvarpsins, sem hefur eftir Rósu að hún eigi ekki von á því að sitja í bæjarstjórn út kjörtímabilið, heldur láta af störfum sem bæjarfulltrúi „á næstu vikum eða mánuðum“. Samhliða því myndi hún láta af stjórnarsetu í Sambandi íslenskra sveitarfélaga. Næstu sveitarstjórnarkosningar fara fram vorið 2026.

Heiða Björg Hilmisdóttir borgarstjóri greindi frá því í gær að hún myndi láta af formennsku í sambandinu. Guðmundur Ari Sigurjónsson sagði sig úr stjórn þegar hann náði kjöri á þing, en hann var áður bæjarfulltrúi Samfylkingarinnar á Seltjarnarnesi.

Rósa hefur verið bæjarfulltrúi í Hafnarfirði frá árinu 2006, og var bæjarstjóri frá 2018 og til síðustu áramóta, þegar Valdimar Víðisson, oddviti Framsóknar í Hafnarfirði, tók við embættinu.