KA á leið í úrslit eftir sigur á Aftureldingu

Sæki samantekt...

Liðin hafa mæst þrisvar á leiktíðinni, KA unnið tvisvar og Afturelding einu sinni. Eftir svo gott sem hnífjafna fyrstu hrinu voru það Mosfellingar sem unnu hana 25–21.

Þær byrjuðu aðra hrinu svo mun betur áður en KA kom sér aftur inn í leikinn og komst yfir. Liðin skiptust á að vera með forystuna en það var að endingu KA sem vann hrinuna 25–21.

Þessi mikla spenna hélt áfram og þriðja hrina var áfram afar jöfn allt fram að lokastigunum. Svo jöfn raunar að upphækkun þurfti til en KA hafði þar betur og vann hrinuna 26–24. KA virtist ætla að hafa yfirhöndina í fjórðu hrinunni en enn eina ferðina urðu lokastigin æsispennandi og staðan jöfn í stöðunni 20–20.

Mummi Lú

Áfram var svo jafnt og staðan varð 24–24 þannig aftur var farið í upphækkun. Dramatíkin var áfram mikil og Aftureldingarkonur neituðu að gefast upp, KA átti hins vegar lokaorðið og vann 28–26 og leikinn þar með 3–1.

Kvennalið KA er því komið í bikarúrslit eins og karlalið félagsins. Það kemur í ljós síðar í kvöld hvort liðið mætir HK eða Álftanesi í úrslitaleiknum.