Samþjöppun markaðarins minni á net­bóluna

Sæki samantekt...

Bandaríski hlutabréfamarkaðurinn hefur leitt hækkanir á undanförnum árum og hafa hlutabréfavísitölur vestanhafs skilað mun betri ávöxtun samanborið við evrópskar vísitölur.

Þá hafa evrópsk bréf sögulega séð verið ódýrari en bandarísk, m.a. vegna þess að tæknigeirinn vegur mun þyngra í bandarískum vísitölum.

Hins vegar hefur verðþróunin farið í aðrar áttir á síðustu mánuðum. S & P 500 hefur lækkað um 3% frá áramótum og Nasdaq Composite um 7,7%, þegar þessi grein er skrifuð. Til samanburðar hefur STOXX Europe 600 vísitalan hækkað um 7% frá áramótum, þýska DAX vísitalan um 13,3%, franska CAC 40 um 8,1% og breska FTSE 100 um 4,9%.

Arnór Gunnarsson, framkvæmdastjóri SIV eignastýringar, bendir á að samþjöppun á bandarískum hlutabréfamarkaði hafi aukist verulega að undanförnu með vexti tæknirisanna og sé orðin viðlíka því sem sást í netbólunni árið 2000 og í kreppunni miklu árið 1929.

„Það eru vissulega ýmis líkindi milli þessara tímabila, til að mynda mikil áhersla fjárfesta á fá fyrirtæki í tæknigeiranum. Á móti er annað ólíkt, til að mynda að tæknifyrirtækin í dag eru að skila hagnaði og sjóðstreymi en í tæknibólunni voru verðhækkanir byggðar á óhóflegum væntingum en ekki raunverulegum rekstrarniðurstöðum.“

Sjá einnig]] Evrópa vaknar af værum blundi

Hann segir erfitt að spá fyrir um hvort evrópsk bréf muni nú leiða vagninn í einhvern tíma og bandarísk bréf sitja eftir.

„Til meðallangs tíma getur alveg verið að aðrir markaðir en sá bandaríski muni skila betri ávöxtun en það verður háð afkomu og árangri einstakra fyrirtækja og erfitt að segja til um hvernig þróunin verður á vísitölunum sjálfum.

Svo virðist sem atburðir síðustu vikna hafi allavega bæði kynt undir leiðtogum Evrópuríkja sem og aukið áhuga fjárfesta á evrópskum hlutabréfum. Eitt er þó víst, að í svona markaðsumróti skapast oft mjög góð tækifæri, sérstaklega ef við horfum fram á áframhaldandi lækkun vaxta.“

Arnór Gunnarsson, framkvæmdastjóri SIV eignastýringar]] © Aðsend mynd (AÐSEND)

Arnór bætir við að mögulegur efnahagssamdráttur vestanhafs, sem kominn er til af tollastríði og verulegum niðurskurði hjá hinu opinbera, gæti leitt til hraðara vaxtalækkunarferlis sem gæti komið sér ágætlega fyrir bandarískan ríkissjóð. Donald Trump hafi tekið við slæmu búi og skuldir ríkissjóðs séu stórt vandamál.

„Skuldir bandaríska ríkissjóðsins eru nærri 37 billjónir Bandaríkjadala (e. $37 trillion), þar af eru rúmar 9 billjónir með gjalddaga á þessu ári. Ef vextir lækka hraðar þá skapast tækifæri til endurfjármögnunar ríkisskulda á hagstæðari kjörum. Þá eru stjórnvöld samt að leika sér að eldinum, enda óvíst hversu djúp niðursveiflan gæti orðið.“

Nánar er fjallað um málið í Viðskiptablaðinu. Áskrifendur geta lesið fréttina í heild hér.