Guðmundur Ingi nýr mennta- og barnamálaráðherra

Sæki samantekt...

Guðmundur Ingi Kristinsson verður nýr mennta- og barnamálaráðherra. Þetta herma heimildir fréttastofu. Ragnar Þór Ingólfsson mun taka við af honum sem þingflokksformaður.

Tveir ríkisráðsfundir verða haldnir í dag, vegna afsagnar Ásthildar Lóu Þórsdóttur úr embætti mennta- og barnamálaráðuneytisins. Forseti Íslands mun veita Ásthildi Lóu lausn úr embættinu á fyrri fundinum, klukkan 15, og í kjölfarið verður nýr ráðherra skipaður, klukkan 15.15.

Heimildir fréttastofu herma að það verði Guðmundur Ingi Kristinsson, varaformaður Flokks fólksins, sem setið hefur á Alþingi frá árinu 2017, þegar flokkurinn komst fyrst á þing. Þá fékk flokkurinn fjóra þingmenn kjörna; Ingu Sæland, formann flokksins, Guðmund Inga, Karl Gauta Hjaltason og Ólaf Ísleifsson.

Karl Gauti og Ólafur voru reknir úr flokknum árið 2018 vegna Klaustursmálsins. Þeir fóru báðir til Miðflokksins í kjölfarið og Karl Gauti er þingmaður Miðflokksins í dag.

Þá hefur fréttastofa heimildir fyrir því að Ragnar Þór Ingólfsson taki við af Guðmundi Inga sem þingflokksformaður.

Ásthildur Lóa sagði af sér sem mennta- og barnamálaráðherra á fimmtudag. Hún gerði það eftir að fréttastofa reyndi að ná tali af henni vegna upplýsinga um að forsætisráðuneytið hefði verið upplýst um að hún hefði fyrir tæpum 35 árum átt barn með 16 ára pilti, þegar hún var 23 ára.

Hún sagði af sér áður en frétt um málið var birt og gaf ekki kost á samtali við fréttamann fyrr en í viðtali klukkan 18, þar sem hún tilkynnti um afsögnina.