Gömlu sambandi Kanada við Bandaríkin lokið

Sæki samantekt...

Mark Carney forsætisráðherra Kanada segir gömlu sambandi ríkisins við Bandaríkin vera lokið. Það samband hafi byggst á sterkum viðskiptatengslum og þéttu samstarfi í öryggis- og hernaðarmálum en nú sé úti um það í ljósi tollastríðs Bandaríkjastjórnar.

Carney sagði í gær að Kanada þyrfti að endurhugsa hagkerfi ríkisins og viðskiptatengsl við erlend ríki. Þá ætti eftir að koma í ljós hvort Kanada gæti framvegis átt sterk viðskiptatengsl við Bandaríkin. Hann hét því að svara tollahækkunum Donalds Trump Bandaríkjaforseta.

„Ég hafna hverri tilraun til að veikja Kanada,“ sagði Carney á blaðamannafundi í gærkvöld.

Bandaríkjastjórn hefur þegar innleitt 25 prósenta toll á innflutning frá Kanada að hluta til. Kanada hefur á móti hækkað tolla á ákveðnar vörur innfluttar frá Bandaríkjunum.

Trump varaði Kanada og Evrópusambandið við því í gær að taka höndum saman í tollastríði gegn Bandaríkjunum. Hann sagði að við því yrði brugðist með enn frekari tollahækkunum gagnvart þeim báðum.

Carney sagði að Trump hefði haft samband við hann í fyrrakvöld. Þeir hefðu rætt um að skipuleggja símafund, sem yrði haldinn á næstu dögum.