Fjórum bjargað úr rústum tæpum 60 klukkutímum eftir skjálftann

Sæki samantekt...

Vinna björgunarfólks heldur áfram þrátt fyrir að nótt sé skollin á í Mjanmar og Taílandi. Björgunarfólk vinnur í kappi við tímann, í von um að finna fólk á lífi í rústum húsa. Síðdegis í dag bárust fréttir af því að fjórum hefði verið bjargað úr rústum skólabyggingar í Mjanmar, tæpum sextíu klukkustundum eftir stóra skjálftann sem varð á föstudag. Björgunarfólk fann lík eins í rústunum.

Jarðskjálftinn sem varð á föstudag var sjö komma sjö að stærð. Síðan þá hafa margir eftirskjálftar orðið sem hafa gert björgunarfólki erfiðara um vik.

Í Mjanmar hafa 1700 fundist látnir og hundraða er saknað.

Í landinu ríkir borgarastyrjöld. Herforingjastjórnin sem þar ræður ríkjum hefur haldið loftárásum sínum áfram í landinu, meðal annars í héruðum sem urðu illa úti vegna jarðskjálftans. Það hefur víða verið gagnrýnt. Utanríkisráðherra nágrannaríkisins Singapúr hefur til að mynda kallað eftir tafarlausu vopnahléi.

Í Taílandi er líf fólks að færast í samt horf. Fyrirtæki hafa hafið störf að nýju og afkastageta spítala er að verða eðlileg.

Í höfuðborginni Bangkok er enn leitað í rústum skýjakljúfs sem var í byggingu. Hann féll við stóra skjálftann. 18 hafa fundist látnir í borginni, þar af 11 á byggingarsvæði skýjakljúfsins.