„Mjög algengt að strákar séu að mála sig“

Sæki samantekt...

Förðunarfræðingurinn og ofurhlauparinn Rakel María Hjaltadóttir fór yfir helstu förðunartrendin í hlaðvarpsþættinum Stéttir landsins.

Í þættinum ræðir Rakel María meðal annars um hverfandi notkun titilsins „MUA“ (Makeup Artist) sem áður var vinsæll á samfélagsmiðlum. Sjálf kýs hún nú að titla sig einfaldlega sem förðunarfræðing, enda segir hún MUA-heitið hafa dalað í notkun síðustu ár.

Þá ræðir hún einnig um muninn milli kynja í förðunarheiminum og segir það miklu algengara en margir geri sér grein fyrir að strákar noti förðun — þó umræðan sé oft takmörkuð og tabúin enn sterk.

„Það er að breytast, það er mjög algengt að strákar séu að mála sig, bara til dæmis Bronzing gelið, BB kremin. Þetta er eithvað sem karlmenn eru að nota, það er að aukast svakalega, mér persónulega finnst það bara geggjað af því ég hugsa oft af hverju mega karlmenn ekki gera þetta,“ sagði Rakel María í þættinum.

„Það hefur oft þótt eithvað „off“ við það, sem það er alls ekki. Strákar eru ekki að setja á sig eye liner og varalit-en bronzing gel, pínu dropi frískar ykkur upp um 10 prósent. Það eru miklu fleiri karlmenn sem að gera það en þora að viðurkenna það. Þetta er svo lítið gamli skólinn að þykja þetta skrítið, mér finnst ótrúlega flott að karlmenn hugsi vel um sig, setja gel í hárið og noti krem.“

Eldri karlmenn oft feimnari við sminkið

Hún bendir einnig á að eldri karlmenn séu oft feimnari við að fá farða fyrir sjónvarpsútsendingar, samanborið við yngri karla sem séu yfirleitt afslappaðri gagnvart slíku.

„Ég hef fengið einn sem hreytti í mig, ég lít nú bara út eins og Donald Trump. Ég er ekki að sminka karlmenn mikið, rétt bara aðeins til að fela roðann í húðinni, meðal annars. Ég held að þegar þeir komi síðan aftur búnir að horfa á sig í sjónvarpinu einu sinni ósminkaða, þá leyfi þeir bara sminkunni að gera það sem hún þarf í næstu útsendingu,“ sagði Rakel María.

Rakel María fór einnig yfir þátttöku sína í svokölluðum Bakgarðshlaupum, þar sem hún hefur hlaupið linnulaust í heilan sólarhring — bæði líkamlega og andlega krefjandi upplifun sem krefst úthalds og sjálfsaga.