Pútín og Trump ræða saman í vikunni

Sæki samantekt...

Til stendur að Donald Trump Bandaríkjaforseti ræði við forseta Rússlands, Vladimir Pútín, í vikunni að sögn Steve Witkoff, erindreka Bandaríkjastjórnar.

Búist er við að Bandaríkjaforseti muni þrýsta á Pútín um að samþykkja 30 daga vopnahlé við Úkraínu. Úkraínumenn kváðust reiðubúnir að fallast á tillöguna á samningafundi þeirra við Bandaríkin í Sádí-Arabíu á þriðjudaginn.

Witkoff átti sjálfur fund með Pútín í síðustu viku og býst við að forsetarnir muni eiga gott og jákvætt samtal í vikunni. Pútín sagði á fimmtudag að hann væri hlynntur vopnahléi að nokkrum skilyrðum uppfylltum, en hefur ekki skýrt frekar hver þau skilyrði séu.

Sagði ekki hver skilyrði Pútíns væru

Vopnahléssamkomulagið yrði aftur á móti að leiða til langtímalausnar á deilunni og fjalla um frumorsök hennar að sögn Pútíns.

Volodymyr Zelensky hefur sakað Pútín um að draga viðræðurnar á langinn til þess að halda stríðinu áfram. Hann sé lygari sem þori ekki að segja Bandaríkjaforseta að hann hafi engan áhuga á vopnahléi.

Witkoff vildi ekki svara fyrirspurnum fréttamanna um hvort Pútín hefði farið fram á að Úkraínuher myndi gefast upp í rússneska héraðinu Kúrsk, stöðvun hernaðaraðstoðar frá Vesturlöndum, bann við friðargæsluliðum eða viðurkenningu alþjóðasamfélagsins á hertökusvæðum Rússa í Úkraínu.

Hann sagðist þó myndu funda með Bandaríkjaforseta í dag til þess að fara yfir hvernig brúa mætti bilið á milli samningsaðila.