Guðmundur Ingi: Vildi að þetta gerðist við betri aðstæður

Sæki samantekt...

„Bara vel, en ég vil segja það, að því miður vildi ég að það væri við betri aðstæður,“ sagði Guðmundur Ingi Kristinsson þegar hann var nýtekinn við embætti sem mennta- og barnamálaráðherra.

Ráðherraskiptin í ríkisstjórninni fóru fram á tveimur ríkisráðsfundum síðdegis. Ásthildur Lóa Þórsdóttir lét af embætti og GUðmundur Ingi tók við.

„Við þessar aðstæður er það þannig og ég vil bara senda kærleikskveðjur til hennar og fjölskyldu hennar. Því miður er leitt að þetta skuli gerast svona en hún er búin að vera með mörg góð málefni í gangi og ég mun taka við þeim og reyna að koma þeim áfram og líka öllum þeim góðu málefnum sem þessi ríkisstjórn er að berjast fyrir.“

Kristrún Frostadóttir forsætisráðherra sagði að það tæki á að kveðja góðan kollega þar sem Ásthildur Lóa hverfur á braut. Hún sagði að Guðmundur Ingi væri sterkur valkostur í embætti mennta- og barnamálaráðherra.

Hún sagði ráðherraskiptin og kringumstæður þeirra ekki hafa áhrif á stjórnarsamstarfið. Þar væri góð pólitísk samstaða og góður félagsskapur.

„Maður verður dálítið dapur á köflum þegar maður er að kveðja góðan félaga og góðan liðsmann ríkisstjórnarinnar eðlilega en við erum bjartsýn og brosandi,“ sagði Inga Sæland, félagsmálaráðherra og formaður Flokks fólksins.

„Þetta er enn eitt málið sem þjappar okkur enn betur saman og ég held að við höfum aldrei staðið þéttar saman en í dag.“

Þorgerður Katrín Gunnarsdóttir utanríkisráðherra sagði að ríkisstjórnin myndi halda áfram störfum sínum og það myndi sjást á verkum hennar.

Hún sýndi fjölmiðlum gjöf sem forseti gaf ráðherrum, Riddara kærleikans. „Ég held að þið hefðuð líka gott af því að fá slíkt.“

Ásthildur Lóa gaf ekki kost á viðtali þegar hún mætti til ríkisráðsfundar í dag. Hún fór út bakdyramegin og hélt á brott eftir fundinn.

Ráðherrar sögðu mis mikið þegar þeir mættu til fundar rétt fyrir klukkan þrjú.