Sextíu þúsund blaðsíður af leynilegum gögnum um morðið á Kennedy gerð opinber

Sæki samantekt...

Donald Trump Bandaríkjaforseti undirritaði tilskipun í janúar um að skjölin um morðið á John F. Kennedy, fyrrum forseta, yrðu gerð opinber.

Í þeim má meðal annars finna ítarlegar upplýsingar um hinn 24 ára Lee Harvey Oswald, sem er sakaður um morðið á Kennedy.

Ljóst er að margir bíða þess með mikilli eftirvæntingu að lesa skjölin því morðið á Kennedy hefur verið uppspretta ótal samsæriskenninga áratugum saman.

Milljónir annarra skjala um launmorðið hafa þegar verið birtar.

Hugsanleg tengsl Oswalds við KGB

Talið er að Oswald hafi hleypt af skotum frá nálægri byggingu þegar bifreið með John F. og Jacqueline Kennedy, fyrrverandi forsetafrú, ók um Dallas-borg.

Warren rannsóknarnefndin, sem sett var á laggirnar ári eftir morðið, komst að þeirri niðurstöðu að Oswald hefði verið einn að verki. Meðal skjalanna sem voru birt í gær er minnisblað frá bandarísku leyniþjónustunni, CIA, um að rússneska leyniþjónustan KGB hefði komist að þeirri sömu niðurstöðu.

Næturklúbbaeigandinn Jack Ruby skaut Oswald til bana tveimur dögum eftir að Kennedy var myrtur.

Í öðru skjali eru upplýsingar um að bandaríska leyniþjónustan hafi hlerað símtal milli Oswalds og KGB liðsforingja í sovéska sendiráðinu nokkrum vikum fyrir morðið.

Rannsakendur segja að það eigi eftir að taka langan tíma að fara í gegnum öll skjölin en eru vongóðir um að þau varpi ljósi á ráðgátuna um morðið á Kennedy.

Þó er ekki talið að birtingin sefi samsæriskenningasmiði.

Hafa þegar birt þúsundir skjala

Þjóðskjalasafn Bandaríkjanna hefur opinberað þúsundir skjala um morðið á Kennedy forseta en haldið leynd yfir öðrum af þjóðaröryggisástæðum.

Þjóðskjalasafnið sagði í desember 2022 að 97% allra þeirra fimm milljóna blaðsíðna sem tengjast rannsókninni á morðinu hafi verið opinberaðar.