Heiða Björg hættir sem formaður SÍS

Sæki samantekt...

Heiða Björg Hilmisdóttir borgarstjóri hyggst hætta sem formaður Sambands íslenskra sveitarfélaga.

Heiða Björg er gestur Kastljóss í kvöld en í viðtalinu tilkynnti hún að á landsfundi Sambandsins á fimmtudag myndi hún stíga til hliðar og nýr fulltrúi yrði kosinn í stjórnina í hennar stað.

Nokkur styr hefur staðið um störf hennar innan stjórnar SÍS allt frá því að hún klauf sig frá stjórninni í aðdraganda kjarasamninga við kennara. Heiða lýsti því þá yfir að hún styddi tillögu sáttasemjara og að til greina kæmi að Reykjavík semdi sérstaklega við kennara á þeim grunni. Nokkrum dögum síðar var tillagan samþykkt af stjórninni en síðan þá hefur gagnrýnin á Heiðu Björg vaxið. Á landsfundi Sambandsins á meðal annars að ræða tillögu þess efnis að hægt verði að víkja formanni frá störfum áður en kjörtímabili hans lýkur. Í Kastljósi segir Heiða Björg að það hafi verið óheppilegt að kljúfa sig frá stjórninni í þessu máli en að þar hafi hún líka verið að endurspegla vilja nýs meirihluta í Reykjavík.

Telur sig ekki hafa misst traust stjórnar SÍS

Heiða segir að hún líti ekki svo á að hún hafi misst traust stjórnarinnar í heild sinni til að starfa áfram sem formaður, en mögulega njóti hún ekki lengur trausts allra Sjálfstæðismanna í stjórninni. Aðspurð hvort hún telji að gagnrýnin á hennar störf sé fyrst og fremst flokkspólitísk segir hún að Sjálfstæðisflokkurinn hafi ávallt litið svo á að hann ætti tilkall til formannsembættisins í SÍS. Það hafi því verið tímamót þegar hún var kjörin formaður með beinni kosningu árið 2022.

Hún segir að laun upp á 3,8 milljónir á mánuði séu vissulega há laun en það sé ekki hennar að meta þau. Sé vilji til þess að endurskoða launakjör hæst settu embættismanna landsins þá standi ekki á henni með það.

Hefur fullan skilning á gagnrýni foreldra barna í Breiðholtsskóla

Foreldrar barna í Breiðholtsskóla stigu enn og aftur fram í síðustu viku og gagnrýndu aðgerðarleysi borgarinnar vegna ofbeldismála sem hafa komið upp í skólanum. Heiða Björg segist hafa fullan skilning á því og ljóst sé að gera þurfi enn meira til að leysa úr flókinni stöðu. Vandamálið sé ekki bundið við þennan skóla og ljóst sé að gera þurfi mun meira fyrir ungt fólk en gert sé í dag.

Hún segist jafnframt bjartsýn á það að öll börn sem verði 18 mánaða á árinu fái leikskólapláss í haust. Búast megi við frekari fréttum af leikskólamálum á næstu dögum.