Tíð ráðherraskipti og útlendingamál bitnuðu á fangelsismálum

Sæki samantekt...

Þorbjörg Sigríður Gunnlaugsdóttir dómsmálaráðherra segir að ríkisstjórnin stefni að byggingu nýs fangelsis í stað þess sem rekið hefur verið á Litla Hrauni í tæpa öld.

Guðrún Hafsteinsdóttir, formaður Sjálfstæðisflokksins, lýsti því yfir þegar hún var dómsmálaráðherra að byggja ætti nýtt fangelsi og var það samþykkt í þáverandi ríkisstjórn Hún tók til máls í óundirbúnum fyrirspurnum á Alþingi í dag og sagðist sakna þess að hafa ekkert heyrt frá nýrri ríkisstjórn um uppbyggingu nýs fangelsis.

Þorbjörg Sigríður sagði að grundvallarmálaflokkar hefðu mætt afgangi í tíð fyrri ríkisstjórnar því útlendingamál hefðu tekið allan tíma hennar.

„Við erum að stíga skref í dómsmálaráðuneytinu um það að hér verði byggt nýtt fangelsi og að þessu ófremdarástandi sem teiknaðist upp á vakt Sjálfstæðisflokksins að því ljúki. En auðvitað er það þannig, það er bara staðreynd málsins, að óheyrileg starfsmannavelta ráðherra Sjálfstæðisflokksins inn og út úr þessu ráðuneyti, sex á jafnmörgum árum eða hvað það var, hefur bitnað á þessum málaflokki eins og svo mörgum öðrum.“