Upp­selt á leik Ís­lands í Kó­sovó annað kvöld

Sæki samantekt...

Fjórtán þúsund Kósóvar munu fylla Fadil Vokrri leikvanginn á morgun þegar að íslenska karlalandsliðið í fótbolta mætir heimamönnum í umspili Þjóðadeildarinnar.

Aron Guðmundsson skrifar frá Pristina í Kósovó.

Um fyrri leik liðanna af tveimur er að ræða í umspili um laust sæti í B-deild Þjóðadeildarinnar. Sigurlið einvígisins tekur sæti í B-deildinni á næsta tímabili á meðan að tapliðið mun leika í C-deild.

Samkvæmt upplýsingum frá upplýsingafulltrúa knattspyrnusambands Kósovó er uppselt á leik liðanna annað kvöld en Fadil Vokrri leikvangurinn tekur tæplega fjórtán þúsund manns í sæti. Ekki er búist við neinum íslenskum áhorfendum á leiknum.

Um fyrsta landsleik íslenska karlalandsliðsins undir stjórn Arnars Gunnlaugssonar er að ræða en íslenska landsliðið mætir hingað til Pristina í Kósovó seinna í dag frá Spáni þar sem að liðið hefur æft undanfarna daga.

Leikur Kósovó og Íslands í umspili Þjóðadeildarinnar verður sýndur í beinni útsendingu og opinni dagskrá á Stöð 2 Sport klukkan korter í átta annað kvöld. Upphitun fyrir leikinn hefst hálftíma fyrir upphafsflaut.