Hamas segja Trump setja vopnahlésviðræður í uppnám

Sæki samantekt...

Talsmaður Hamas-samtakanna, Hazem Qassem, segir hótanir Donald Trumps Bandaríkjaforseta í garð samtakanna og íbúa Gaza setja vopnahlésviðræður í uppnám.

Forsetinn birti færslu á samfélagsmiðli sínum Truth Social í gærkvöldi og skipaði þar Hamas að sleppa gíslum í haldi á Gaza samstundis ellegar fengju þau og íbúar Gaza að gjalda.

Í tilkynningu sagði Qassem að Hamas hafni alfarið hótunum Trump. Þau væru einungis til þess fallin að flækja vopnahlésviðræður og hvetja Ísrael til þess að falla frá gefnum loforðum.

Frjáls félagssamtök á borð við Amnesty International og Medical Aid for Palestinians hafa einnig fordæmt hótanir Trumps og segja þau ómannúðleg.

Amnesty segir ummæli Trumps einkennast af svipaðri „þjóðarmorðsorðræðu“ og hafi verið viðhöfð af ísraelskum stórnmálamönnum.

Arabaríkin vilja standa að uppbyggingu á Gaza

Vopnahlésviðræður á milli Hamas og Ísraels eru þegar á viðkvæmu stigi en Ísrael hefur farið fram á að lengja fyrsta áfanga þess sem endaði formlega 1. mars. Hamas vill að seinni áfanginn hefjist á áætluðum tíma.

Egyptar hafa nýverið lagt fram tillögu um uppbyggingu á Gaza með stuðningi Arabaríkjanna sem myndi tryggja að Palestínumenn fengju að vera þar áfram. Tillagan kallar einnig á að Gaza verði tímabundið stjórnað af nefnd óháðra sérfræðinga og friðargæsluliðum.

Trump og Benjamín Netanjahú, forsætisráðherra Ísraels, hafa hafnað tillögunni en Frakkar tilkynntu í dag að þeir styðji tillöguna að því skilyrði uppfylltu að Hamas-samtökin fái ekki að koma nálægt framkvæmdinni.

Trump vill yfirráð á Gaza

Tillagan var gerð eftir að Donald Trump Bandaríkjaforseti lagði til að Bandaríkin fengju yfirráð yfir Gaza og myndu stýra uppbyggingu þar.

Trump lagði til að Palestínumenn yrðu fluttir frá Gaza til nágrannaríkjanna Egyptalands og Jórdaníu. Leiðtogar Arabaríkjanna eru afar mótfallnir tillögu Trumps en Benjamín Netanjahú forsætisráðherra Ísraels sagðist styðja hana.

Bandaríkjaforseti birti óvenjulegt og umdeilt myndband af framtíðarsýn sinni á Gaza með aðstoð gervigreindarinnar, sem sýnir meðal annars risavaxna gyllta styttu af Trump sjálfum.