Trump svarar Kanada fullum hálsi: Hækkar tolla á áli og stáli í 50%

Sæki samantekt...

Donald Trump Bandaríkjaforseti segist ætla að svara Kanada í tvöfaldri mynt og tvöfalda tolla á áli og stáli. Hann segir tilskipunina strax taka gildi á morgun.

Forsetinn undirritaði í síðasta mánuði tilskipun um að 25% tollar yrðu lagðir á allt stál og ál, hvaðanæva úr heiminum.

Doug Ford, fylkisstjóri Ontario í Kanada, kvaðst í gær ætla að beita Bandaríkin hámarksþrýstingi vegna tollastríðsins sem Bandaríkjaforseti hefði efnt til og hækka tolla á raforkuútflutning til Bandaríkjanna um 25%.

Ætlar ekki að láta Trump vaða yfir sig

Talið er að hækkunin muni hafa áhrif á um 1,5 milljón heimila í Minnesota, Michigan og New York í Bandaríkjunum. Trump sagðist myndu lýsa yfir neyðarástandi í rafmagnsmálum í ríkjunum þremur.

Ford hefur brugðist við og kveðst tímabundið ætla að láta af áformunum um álagningu á rafmagnsreikning Bandaríkjamanna á meðan samningaviðræður við stjórn Trumps haldi áfram. Hann muni þó ekki leyfa Trump að vaða yfir sig á skítugum skónum.

„Ég er ekki að reyna að níðast á almenningi í Bandaríkjunum en maður verður að nota þau spil sem maður hefur á hendi,“ sagði Ford.