Óttast að kvika flæði í sprungum undir Grindavík og komi upp þar

Sæki samantekt...

Benedikt Ófeigsson, sviðsstjóri aflögunarmælinga hjá Veðurstofu Íslands, segir að mögulega muni kvika renna í sprungum undir Grindavík og koma upp þar.

Þetta sagði Benedikt í aukafréttatíma RÚV.

Eins og greint var frá í morgun opnaðist sprunga sunnan við varnargarðana fyrir ofan Grindavík en flæði úr henni er tiltölulega lítið. „Hún er ekki stór en hún er örlítið að lengjast í áttina að Grindavík, ég held það séu 500 metrar í nyrstu húsin.“

Benedikt sagði að möguleiki væri á að kvika myndi renna ofanjarðar í átt að bænum en vísindamenn hafa einnig áhyggjur af öðru.

„Það getur komið hraunflæði, ef það er nógu langvinnt, inn í bæinn en líka er möguleikinn á því að það eru miklar sprungur undir Grindavík og við höfum áhyggjur af því að kvika flæði ofan í sprungunum og upp einhvers staðar innan bæjarins, það er möguleiki. Við getum ekki útilokað það, það er kannski aðaláhyggjuefnið frekar en að hún lengist mikið,“ sagði Benedikt.