Signal-hópspjallið verður rannsakað

Sæki samantekt...

Varnarmálaráðuneyti Bandaríkjanna ætlar að rannsaka notkun Pete Hegseth varnarmálaráðherra á samskiptaforritinu Signal til að ræða í hópspjalli um loftárásir á Jemen. Þetta kom fram í minnisblaði ráðuneytisins í dag.

Ætlunin er að rannsaka hvort varnarmálaráðherrann og annað starfsfólk ráðuneytisins hafi farið að reglum um notkun samskiptaforrita í þessu tilviki.

Þjóðaröryggisráðgjafi Bandaríkjastjórnar, Mike Waltz, sem bætti blaðamanni í spjallið í misgáningi, hefur sagst taka fulla ábyrgð á því. Athygli hefur vakið að fulltrúar Bandaríkjastjórnar ræði málefni sem árásir á erlend ríki í hópspjalli sem þessu. Meðal annarra sem tóku þátt í samræðunum voru varaforseti Bandaríkjanna J. D. Vance og utanríkisráðherrann, Marco Rubio.

Árásin sem rætt var um í hópspjallinu var gerð 15. mars á Húta í Jemen. Hið minnsta 31 var drepinn og 101 særður.