„Ég tók bara allt of djúpt í árinni“

Sæki samantekt...

Þorbjörg Sigríður Gunnlaugsdóttir dómsmálaráðherra segir ummæli Ásthildar Lóu Þórsdóttur, mennta- og barnamálaráðherra vera mjög óheppileg og ekki góð.

Í gær sagði Ásthildur Lóa að hún væri löngu hætt að gera ráð fyrir réttlæti hjá íslenskum dómstólum. Þau orð lét hún falla eftir að héraðsdómur Reykjavíkur úrskurðaði henni í óhag í máli hennar gegn sýslumanninum á höfuðborgarsvæðinu.

Þorbjörg Sigríður segir það Ásthildar Lóu að svara fyrir ummælin.

„Ég er auðvitað dómsmálaráðherra í þessari ríkisstjórn og ég ber fullt traust til íslenskra dómstóla og finnst mjög óheppilegt að talað sé með öðrum hætti. Ég hef rætt um þetta mál við viðkomandi ráðherra og lít svo á að þetta séu ummæli sem féllu í hita leiksins en hún verður auðvitað sjálf að svara fyrir þessi ummæli.“

RÚV/Ragnar Visage

Í gær sagði Áslaug Arna Sigurbjörnsdóttir, þingmaður Sjálfstæðisflokksins og fyrrum dómsmálaráðherra, ummæli Ásthildar Lóu grafa undan dómskerfinu.

Spurð um hvort ummæli Ásthildar Lóu grafi undan dómskerfinu segir Þorbjörg Sigríður: „Þessi ummæli eru óheppileg, mjög óheppileg. Afstaða mín sem dómsmálaráðherra um traust til íslenskra dómstóla liggur fyrir og eins og ég segi. Menntamálaráðherra útskýrir það betur hvað hún átti við og í hvaða samhengi ummælin féllu. En þetta eru ekki góð ummæli.“

Sér eftir ummælunum

Ásthildur Lóa segir að hún hafi verið mjög svekkt með niðurstöðu héraðsdóms þegar orðin voru látin falla.

Ásthildur Lóa Þórsdóttir, mennta- og barnamálaráðherra, í dómsal í Héraðsdómi Reykjavíkur vegna málaferla hennar og eiginmanns hennar. RÚV/Ragnar Visage

„Ég tók bara allt of djúpt í árinni, ég gerði það. Ég var bara mjög svekkt og þetta er búin að vera margra ára barátta, þannig að ég var bara mjög svekkt. En ég get að sjálfsögðu ekkert fullyrt um dómstóla eða réttlæti almennt þó að ég sé ekki sátt við niðurstöðuna í mínu máli.“

Sérðu eftir þessum ummælum?

„Jájá, ég geri það,“ segir Ásthildur Lóa Þórsdóttir, mennta- og barnamálaráðherra.