Arnar ræðir samtal sem hann átti við Gylfa Þór fyrir nokkru - „Gylfi er bara þannig gerður“

Sæki samantekt...

Arnar Gunnlaugsson valdi Gylfa Þór Sigurðsson ekki í fyrsta hóp sinn sem landsliðsþjálfari. Ástæðan er sú að hann spilar á Íslandi þar sem nú er undirbúningstímabil.

Gylfi Þór, sem af flestum er talinn besti landsliðsmaður sögunnar, gekk í raðir fyrrum liðs Arnars í Víkingi frá Val á dögunum.

„Á tímapunkti kom það til greina en svo ferðu að meta kosti og galla. Því miður er þetta blessaða undirbúningstímabil á Íslandi ekki kjörið til að spila svo landsleiki. Hann er örugglega ekki sammála mér í því en í þessu tilfelli taldi ég að það væri betra að gefa honum tækifæri til að koma sér í enn betra stand og vera svo klár ef kallið kemur í júní,“ sagði Arnar við 433.is í dag.

Please enable JavaScript [[play-sharp-fill

Arnar segir að Gylfi sé án efa svekktur með að vera ekki í hópnum.

„Ég átti samtal við hann fyrir mánuði eða 6 vikum síðan. Hann gerði sér klárlega vonir um að vera í þessum hópi. Gylfi er bara þannig gerður að ef kallið kæmi frá Barcelona yrði hann tilbúinn. Hann er fullur sjálfstrausts og hefur það mikla trú á sínum hæfileikum og réttlætanlega svo. En það er alltaf þjálfarinn sem ræður og því miður er ekki pláss fyrir hann í þessum hóp.“

Ítarlegt viðtal við Arnar er í spilaranum.