Trump sendir á þriðja hundrað til El Salvador þvert á dómsúrskurð

Sæki samantekt...

Bandaríkjamenn hafa vísað á þriðja hundrað einstaklingum frá Venesúela og Mexíkó til El Salvador gegn dómsúrskurði.

Í yfirlýsingu í gær sagðist Donald Trump Bandaríkjaforseti ætla að beita lögunum til að vísa liðsmönnum glæpagengis frá Venesúela úr landi á grundvelli laga frá átjándu öld.

Samkvæmt lögunum má forseti Bandaríkjanna vísa ríkisborgurum óvinaríkis úr landi á stríðstímum, handtaka fólk eða vísa því úr landi án málsmeðferðar. Lögunum hefur aðeins verið beitt fjórum sinnum síðan þau voru innleidd fyrir nærri tvö hundruð og þrjátíu árum, síðast í seinni heimsstyrjöld.

Alríkisdómari í Bandaríkjunum frestaði aðgerðum Trump og sagði í úrskurði sínum að orðalag í lögunum, til að mynda hugtakið innrás, eigi við fjandsamlegar aðgerðir óvinaríkja. Lögin séu því ekki góður grundvöllur fyrir brottvísunina.

„Úps… of seint núna“

Forseti El Salvador, Nayib Bukele, sagði í dag að 238 liðsmenn glæpagengisins Tren de Aragua frá Venesúela hefðu komið til landsins í morgun ásamt 23 liðsmönnum úr mexíkóska genginu MS — 13.

Bukele virðist taka á móti glæpamönnunum fegins hendi og gerði lítið úr dómsúrskurðinum á samfélagsmiðlum og tísti „Úps… of seint núna.“ Hann staðfesti að liðsmennirnir hefðu strax verið færðir í fangaklefa við komu í landinu og sagði að Bandaríkin myndu greiða sanngjarnt verð með föngunum.

Bukele hefur skorið upp herör gegn glæpagengjum í landinu á undanförnum árum og réðst í byggingu gríðarstórs fangelsis, en fjöldi mannréttindasamtaka hafa gagnrýnt lífskjör fanga í El Salvador.