„Við áttum ekki von á þessum stórkostlegu viðbrögðum“

Sæki samantekt...

Mun betur gengur að fjármagna nýtt björgunarskip á sunnanverðum Vestfjörðum en búist var við. Umsjónarmaður björgunarbátsins segir einstaklinga, félagasamtök og fyrirtæki hafa tekið höndum saman.

„Við áttum ekki við von á þessum stórkostlegu viðbrögðum sem við fengum. En þetta er ótrúlegt,“ segir Smári Gestsson, umsjónarmaður Varðar II á Patreksfirði.

Flest eldri björgunarskip Landsbjargar eru af ARUN-gerð, smíðuð á 9. áratugnum og keypt á gjafverði af Konunglegu bresku sjóbjörgunarsamtökunum þegar þau voru gerð úreld þar.

„Það er nú ekki einu sinni klósett í gamla Arun, það er bara ein fata,“ bendir Smári á. „Bretinn var nú ekkert með mikið af útbúnaði fyrir mannskapinn þarna um borð til matseldar eða annað. Þegar bátarnir komu til landsins var ekkert nema teketill um borð.“

Skipin fara ekki hratt yfir, einungis um 15 mílur, og erfitt er orðið að fá varahluti. Nú á að skipta þeim út fyrir öflugri fley.

„Nýju skipin ganga á 32–35 mílur sem gerir útköllin öll styttri og allt viðbragð við slysum og óhöppum að það verður miklu fljótara,“ segir Smári. Þá er betri aðstaða, ekki bara fyrir áhöfnina heldur líka heilbrigðisstarfsfólk.

Nýr bátur kostar 360 milljónir og hluta af því fé þurfa svæðin að afla sjálf.

„Okkur leist nú ekkert á þetta því við þurfum að borga af bátnum um 85 milljónir. Þegar ég var spurður hvað ég teldi að ég myndi ná í mikla peninga hérna á mínu svæði giskaði ég á svona fimm milljónir,“ segir Smári.

Annað kom á daginn. Stór og smá fyrirtæki, kvenfélög, Lionsklúbbur eru meðal þeirra sem hafa lagt sitt af mörkum. Strandveiðisjómenn í Strandveiðifélaginu Krók hafa lagt til tæplega 30 milljónir.

„Maður er stoltur af því hvað fólk hérna á sunnanverðum Vestfjörðum er ótrúlega jákvætt fyrir þessu og sér hvað þetta getur gert og hvaða áhrif þetta hefur að eiga gott björgunarskip.“