Hætti störfum og sagði afstöðu Kennedys til bólusetninga ógna lýðheilsu

Sæki samantekt...

Peter Marks, yfirmaður bólusetningadeildar matvæla- og lyfjaeftirlits Bandaríkjanna, hefur sagt upp störfum og sakar heilbrigðisráðherra landsins um aðför að vísindalegum sannleika. New York Times og Wall Street Journal herma að heilbrigðisráðuneytið hafi þrýst á Marks að víkja úr starfi.

Robert F. Kenndy yngri er heilbrigðisráðherra í nýrri ríkisstjórn Donalds Trump. Hann hefur árum saman viðrað efasemdir um gagnsemi bólusetninga og meðal annars ráðlagt inntöku vítamína við mislingasmitum, sem hefur fjölgað nokkuð í Bandaríkjunum.

Marks sagði í uppsagnarbréfi að hörð afstaða Kennedys varðandi bólusetningar væri óábyrg og ógn við lýðheilsu. Hann sagði ráðherrann hvorki hafa áhuga á sannleik né gagnsæi og væri aðeins annt um að öðlast fylgjendur.

Marks sagðist hafa ítrekað reynt að koma til móts við nýja ríkisstjórn í þeim tilgangi að styrkja trú á gagnsemi bólusetninga. Hins vegar hefði komið í ljós að ríkisstjórnin hefði ekki áhuga á því.