Rússar segja starfsfólki íslenska sendiráðsins ekki hafa verið ógnað

Sæki samantekt...

Maria Zakharova, talskona rússneska utanríkisráðuneytisins, skellti upp úr á blaðamannafundi í gær, spurð hvort starfsfólki íslenska sendiráðsins í Moskvu hafi verið ógnað.

„Leyfðu mér að segja þér satt. Þetta er auðvitað lygi, það liggur fyrir,“ sagði Zakharova.

Morgunblaðið greindi fyrst frá og vísaði í frétt Pravda.

Þórdís Kolbrún Reykfjörð Gylfadóttir, fyrrverandi utanríkisráðherra, greindi fréttastofu frá því á dögunum að starfsfólki íslenska sendiráðsins hefði verið ógnað með ýmsum hætti og að ekki hefði verið hægt að tryggja öryggi þeirra í Moskvu. Það hefði spilað inn í lokun sendiráðsins en hefði þó ekki verið meginástæða ákvörðunarinnar.

Ísland þjáist af Rússafóbíu

Núverandi utanríkisráðherra Þorgerður Katrín Gunnarsdóttir tók undir með Þórdísi og sagði að friðhelgi starfsfólks sendiráðsins hafi verið gróflega brotin.

Spurð um ummæli núverandi og fyrrverandi utanríkisráðherra sagði Zakharova augljóst að þær hefðu gert það til þess að sýna hollustu sína við Atlantshafsbandalagið og andrússneska stefnu Vesturlandanna.

Ákvörðunin um að loka sendiráðinu hafi valdið óbætanlegu tjóni á samstarfi milli þjóðanna enda ljóst að Ísland þjáist af „Rússafóbíu“ og styðji við „ný-nasista í Kænugarði.“

Sagði hún jafnframt að þeim hefðu ekki borist neinar kvartanir frá íslenskum stjórnvöldum um ógnir eða hótanir gegn íslenska sendiráðinu eða starfsfólki þess.