Tollarnir skárri en reiknað var með

Sæki samantekt...

„Við höfðum gert greiningar á því sem við töldum að myndi gerast en svo fór þetta betur en við reiknuðum með og nokkuð öðruvísi,“ segir Daði Már Kristófersson fjármála- og efnahagsráðherra um tollana sem Donald Trump Bandaríkjaforseti kynnti í fyrradag.

Trump tilkynnti að 10% lágmarkstollur yrði lagður á allar innfluttar vörur til Bandaríkjanna og fellur Ísland þar undir. 20% tollur verður lagður á allar vörur innfluttar frá Evrópusambandinu (ESB). Aðspurður hvort það felist einhver tækifæri í því að lenda í lægsta tollflokki segir hann að það þurfi að skoða.

„Við höfðum kannski ekki ímyndunarafl í að það yrði svona mikill munur á milli okkar og helstu viðskiptaþjóða. Það er bara greining sem við þurfum að fara í núna þegar við vitum nákvæmlega hvernig þetta er,“ segir Daði.

Sigurður Hannesson, formaður Samtaka iðnaðarins (SI), segir í samtali við Morgunblaðið að ytri skilyrði séu að versna. Bandaríkin hafa verið vaxandi markaður fyrir íslenskar vörur „þannig að þetta er áhyggjuefni fyrir útflutninginn“.

Eru einhver tækifæri í þessu?

„Það verður auðvitað að koma í ljós. Það er rétt að hlutfallslega komum við betur út úr þessu en ýmis önnur ríki þannig að það kann að skapa einhver tækifæri,“ segir Sigurður en bætir við að með tímanum minnki vonandi óvissan. Hann segir tvennt skipta SI máli á þessari stundu; að stjórnvöld rói að því öllum árum að koma í veg fyrir að Ísland lendi í tollum gagnvart ESB og að stjórnvöld hugi að því að efla samkeppnishæfni iðnaðarins og atvinnulífsins.

„Þá erum við auðvitað að horfa á þætti eins og regluverk, eftirlit, skatta og gjöld. Við horfum á skilyrði til rannsóknar og þróunar, sem hafa verið hagfelld og verða að vera það áfram. Við erum að horfa á raforkumál, svo dæmi séu tekin,“ segir hann.

Ráðuneytisstjóri utanríkisráðuneytisins fundaði í gær með staðgengli sendiherra Bandaríkjanna á Íslandi vegna málsins en Morgunblaðið fékk ekki svör um niðurstöðu fundarins.

Lesa má meira um málið í Morgunblaðinu í dag og í nýja Mogga-appinu