Halla afhenti ráðherrum spil Bryndísar Klöru

Sæki samantekt...

„Þessi samstaða ríkisstjórn heldur áfram og við erum að ganga í verkin núna. Þið munið sjá það á næstu dögum,“ sagði Þorgerður Katrín Gunnlaugsdóttir utanríkisráðherra þegar hún gekk út frá Bessastöðum að ríkisráðsfundi loknum.

Á fundinum veitti Halla Tómasdóttir, forseti Íslands, Ásthildi Lóu Þórsdóttur lausn frá embætti mennta- og barnamála en hún tilkynnti um afsögn sína á fimmtudag.

Guðmundur Ingi Kristinsson tók við embættinu af Ásthildi en hann hefur setið á þingi fyrir Flokk fólksins frá árinu 2017 og jafnframt verið varaformaður flokksins.

Á fundinum afhenti Halla Tómasdóttir ráðherrum ríkisstjórnarinnar kærleiksspil til stuðnings minningasjóði Bryndísar Klöru Birgisdóttur en hún lést í kjölfar stunguárásar á menningarnótt í miðbæ Reykjavíkur á síðasta ári.

„Við fengum öll riddara kærleikans frá forsetanum og ég held að þið hefðuð líka gott af því,“ sagði Þorgerður og vísaði til blaðamanna sem stóðu á tröppum Bessastaða.