„Nóg komið“ af yfirlýsingum Trumps

Sæki samantekt...

Nóg er komið af yfirlýsingum Donalds Trump Bandaríkjaforseta um yfirtöku á Grænlandi, að mati Mute B. Egede, formanns landsstjórnar Grænlands. Sigurvegari þingkosninga á Grænlandi í vikunni, Jens-Frederik Nielsen, leiðtogi Demókrata, segir yfirlýsingar Bandaríkjaforseta óviðeigandi og sýna að Grænlendingar verði að standa saman.

Egede hefur kallað formenn stjórnmálaflokka á Grænlandi saman til neyðarfundar í dag vegna málsins.

Síðast í gær endurtók Trump yfirlýsingar um fyrirætlanir sínar um að ná yfirráðum á Grænlandi. Á fundi með Mark Rutte, framkvæmdastjóra NATO, í Hvíta húsinu, sagði hann að Bandaríkin þurfi að ráða yfir Grænlandi til að tryggja öryggi á alþjóðavísu. „Veistu Mark, við þurfum Grænland fyrir alþjóðaöryggi, ekki bara öryggi, heldur alþjóðaöryggi,“ var meðal þess sem Trump sagði við framkvæmdastjórann í gær. „Við tölum saman um þetta.“

Þá sagði Bandaríkjaforseti enn fremur við Rutte að hann teldi að það myndi gerast einn daginn að Bandaríkin ráði yfir Grænlandi. NATO gæti þurft að blanda sér í málið. Þá sagði hann mögulegt að Bandaríkin vilji senda fleiri hermenn til Grænlands.

Mark Rutte, framkvæmdastjóri Atlantshafsbandalagsins og Donald Trump, Bandaríkjaforseti, á fundi í gær. AP/Pool/Uncredited

Rutte svaraði Trump á þann hátt að hann vilji ekki draga NATO inn í umræður um málið. Ríkin á norðurslóðum ættu að ræða þetta. Trump sagði dönsk stjórnvöld ekki vilja ræða málið við sig.

„Bandaríkjaforseti hefur enn og aftur viðrað þær hugmyndir sínar að innlima Grænland. Ég get alls ekki samþykkt slíkt,“ sagði Egede í færslu á Facebook. Um fundinn í dag segir Egede mikilvægt að ítreka það að Grænlendingar hafni hugmyndum Trumps. „Þú mátt ekki halda áfram að koma fram okkur af slíku virðingarleysi. Það er nóg komið.“