Heiða Björg mótmælir handtöku

Sæki samantekt...

Heiða Björg Hilmisdóttir, borgarstjóri Reykjavíkur, tekur þátt í sameiginlegri áskorun evrópskra borgarstjóra til tyrkneskra yfirvalda, vegna skyndilegrar handtöku borgarstjóra Istanbúl, Ekrem İmamoğlu, þann 19. mars.

Það eru samtökin EuroCities sem halda utan um áskorun borgarstjóranna, en meðal borgarstjóra sem hafa skrifað undir eru Anne Hidalgo, borgarstjóri Parísar, Juhana Vartiainen, borgarstjóri Helsinki, og Erik Lae Solberg, borgarstjóri Óslóar, að því er segir í tilkynningu frá Reykjavíkurborg.

„Það skiptir máli að Reykjavík taki alltaf afstöðu með mannréttindum og lýðræði. Hér er lýðræðinu stórlega ógnað, og því er þessi handtaka óásættanleg,“ segir Heiða Björg í tilkynningunni.

Handtakan fordæmd

Í sameiginlegri áskorun segir:

„Við [borgarstjórar í Evrópu] fordæmum handahófskennda fangelsun borgarstjóra Istanbúl og lýsum yfir djúpum áhyggjum af stöðunni, sem og endurteknum árásum á grundvallarréttindi og sjálfstæði sveitarfélaga í Tyrklandi. Þessar handtökur, ásamt stöðugum þrýstingi á lýðræðislega kjörna fulltrúa, marka nýtt tímabil brota á lýðræðislegum ferlum í landinu.

Ekrem Imamoğlu var kjörinn í frjálsum kosningum og er tákn um von fyrir framtíð sem byggir á fjölhyggju, réttlæti og virðingu fyrir grundvallarfrelsi.

Við skorum því á tyrknesk yfirvöld að:

Leysa borgarstjóra Istanbúl og stjórnarandstæðinga úr haldi þegar í stað.

Hætta pólitískum ákærum, þrýstingi og árásum á sjálfstæði sveitarfélaga.

Tryggja virðingu fyrir lýðræðislegum ferlum og mannréttindum í Tyrklandi.

Enn fremur hvetjum við stofnanir Evrópu til að grípa tafarlaust til aðgerða til að tryggja frelsi kollega okkar og gera allt sem nauðsynlegt er til að vernda réttarríkið í Tyrklandi.

Í þessu máli stöndum við í fullri samstöðu með íbúum Istanbúl og öllum Tyrkjum sem hafa áhyggjur af örlögum borgarstjórans.“