Orri kominn á blað í fyrsta leiknum sem fyrir­liði

Sæki samantekt...

Staðan að loknum fyrri hálfleik í leik Íslands og Kósovó er jöfn. Heimamenn komust yfir en Orri Steinn Óskarsson jafnaði metin í sínum fyrsta leik sem landsliðsfyrirliði.

Leikur Íslands og Kósovó í Þjóðadeild UEFA er í fullum gangi en leikurinn er sá fyrsti undir stjórn nýja landsliðsþjálfarans Arnars Gunnlaugssonar.

Leikurinn er liður í umspili um sæti í B-deild Þjóðadeildarinnar en liðin mætast á nýjan leik á sunnudaginn.

Kósovó tók forystuna í leiknum á 19. mínútu. Lumbardh Dellova skoraði þá með skoti á nærstöngina eftir vandræðagang í íslenska liðinu í kjölfarið á föstu leikatriði Kósóva.

Aðeins þremur mínútum síðar jafnaði hins vegar Orri Steinn Óskarsson metin í sínum fyrsta leik sem fyrirliði Íslands. Orri Steinn fékk þá frábæra sendingu innfyrir vörn heimamanna frá Ísaki Bergmann Jóhannessyni, lék á Arijanet Muric í markinu og kláraði vel.

Staðan er í hálfleik er 1–1 en leikurinn er í beinni útsendingu á Stöð 2 Sport og í beinni textalýsingu hér á Vísi.