Bandaríska leyniþjónustan hættir að deila hernaðarupplýsingum með Úkraínu

Sæki samantekt...

Bandaríkjastjórn hefur stöðvað alla samnýtingu hernaðarupplýsinga með stjórnvöldum í Úkraínu. Þjóðaröryggisráðgjafi Bandaríkjanna segir þau taka skref til baka og ætla að endurskoða allar hliðar á sambandi ríkjanna.

Í gær bárust fregnir af ákvörðun stjórnvalda vestanhafs um að frysta alla hernaðaraðstoð við Úkraínu. Í morgun hófust vangaveltur um það hvort það þýddi að Bandaríkin hættu einnig að deila hernaðarupplýsingum með Úkraínu. Það staðfesti John Ratcliffe, forstjóri leyniþjónustu Bandaríkjanna, CIA.

Þjóðaröryggisráðgjafi Bandaríkjanna, Mike Waltz, segir Bandaríkin vera að endurskoða allar hliðar sambandsins við Úkraínu. Hann sagði samt sem áður að Bandaríkin væru reiðubúin að endurskoða ákvarðanir sínar ef samkomulag næst um friðarviðræður við Rússa.

Í stefnuræðu sinni á bandaríska þinginu í gær sagði Donald Trump Bandaríkjaforseti að Zelensky væri tilbúinn í friðarviðræður. Það hafði þó ekki áhrif á ákvörðun hans um að frysta hernaðarstuðning.

Volodymyr Zelensky Úkraínuforseti sagði í dag, eftir fund með Olaf Scholz, fráfarandi Þýskalandskanslara, að varanlegur friður væri raunhæft markmið ef Evrópa og Bandaríkin stæðu saman.

Enginn fundur Macrons, Starmers og Zelensky með Trump á dagskrá

Fyrr í dag bárust fregnir af því að í undirbúningi væri fundur Emmanuels Macron, forseta Frakklands, Keir Starmer, forsætisráðherra Bretlands og Volodymyr Zelensky, forseta Úkraínu, með Donald Trump Bandaríkjaforseta.

Það var talskona Frakklandsforseta sem sagði þetta á blaðamannafundi en síðan hefur skrifstofa forsetans dregið þetta til baka og sagt að enginn slíkur fundur sé í bígerð.