Meðferðarheimilið strandaði á 100 milljónum

Sæki samantekt...

Ekkert bólar á nýju meðferðarheimili í Garðabæ, en bygging þess strandaði á eitt hundrað milljónum króna, sem bærinn vildi fá greiddar fyrir byggingarréttar- og gatnagerðargjöld. Ríkið hafnaði því, þar sem það gæti haft í för með sér fordæmisgildi fyrir aðrar framkvæmdir.

Skrifað var undir viljayfirlýsingu um byggingu meðferðarheimilisins í Garðabæ árið 2018. Í mars í fyrra var ljóst að Barna- og fjölskyldustofa vildi ekki bíða lengur.

Ítarlega var fjallað um málið í Speglinum í kvöld.

Samkvæmt gögnum frá fjármálaráðuneytinu og mennta- og barnamálaráðuneytinu, hefur bygging meðferðarheimilisins strandað á samningaviðræðum fjármálaráðuneytisins við Garðabæ.

Grafík

Tölvupóstsamskipti varðandi meðferðarheimili í Garðabæ.

Bærinn vildi að ríkið greiddi sextíu milljónir í byggingarréttargjöld og gatnagerðargjöld upp á fjörutíu milljónir króna; rúmar hundrað milljónir alls. Fjármálaráðuneytið sagði það útilokað.

Grafík

Tölvupóstsamskipti varðandi meðferðarheimili í Garðabæ.

Funi Sigurðsson, framkvæmdastjóri meðferðasviðs hjá Barna- og fjölskyldustofu, segir miður að peningar skuli vera fyrirstaða. „Mín persónulega skoðun er sú að að peningar eiga ekki að stoppa þessa hluti. Ég er bara á því að við eigum að gera það sem við þurfum að gera fyrir þau börn sem eru í þessari stöðu,“ segir Funi. „Við erum með þarna með viðkvæmasta hópinn af öllum og mér finnst að við eigum að gera allt sem við getum til að vernda hann.“

RÚV/Ragnar Visage

Hann segir leitt að ekki hafi fengist botn í þetta mál, á meðan hver aðilinn bendir á annann. „Auðvitað er það hundfúlt og á meðan erum við bara að bíða og erum búin að vera í ansi mikilli biðstöðu í mjög langan tíma,“ segir Funi.

Í nóvember 2023 segist mennta- og barnamálaráðuneytið ekki vilja bíða lengur heldur færa verkefnið á Skálatúnsreitinn í Mosfellsbæ. Funi sendi svo póst á Framkvæmdasýslu ríkisins og ráðuneytins í mars í fyrra, þar sem hann sagðist ekki vilja bíða lengur eftir Garðabæ. Þau skilaboð virðast ekki hafa skilað sér til Garðabæjar.

Grafík

Tölvupóstur sem Funi sendi á Framkvæmdasýslu ríkisins og mennta- og barnamálaráðuneytið í fyrra.

Funi segist fullviss um að nýtt meðferðarheimili verði reist, hvar svo sem það verður. „Ég þori svo sem ekki alveg að svara því hvar þetta meðferðarheimili mun rísa á endanum, en ég hef bara fulla trú á því að það muni rísa,“ segir Funi.