Sonur Ásthildar Lóu segir í besta falli hlægilegt að móðir sín hafi tálmað umgengni

Sæki samantekt...

Þór Símon Hafþórsson, sonur Ásthildar Lóu Þórsdóttur, fráfarandi mennta- og barnamálaráðherra, segist ótrúlega stoltur af því hvernig móðir hans hefur tekist á við umræðu síðustu daga.

Þetta segir Þór í færslu sem hann birti á Facebook-síðu sinni í dag.

„Hún hefur alltaf verið frábær mamma, staðið sig mjög vel sem þingmaður og síðan ráðherra þótt í því embætti hafi hún fengið alltof stuttan tíma til að sanna sig.“

Þór segist stoltur af því hvernig móðir hans bar sig í sjónvarpsviðtali við RÚV á fimmtudag þegar hún sagði af sér.

„En vegna fréttaflutnings á fimmtudag og þá sérstaklega vegna þess hvernig þær fréttir voru framsettar er búið að gera þetta stolt mitt tortryggilegt í augum almennings. Dómharkan sem ég hef orðið var við þrátt fyrir að hafa forðast eftir bestu getu alla frétta- og samfélagsmiðla frá því á fimmtudag var viðbúin en er engu að síður sorgleg. Af því sögðu er ég hins vegar gríðarlega þakklátur fyrir allan þann stuðning sem hún og ég og aðrir í fjölskyldunni höfum fengið.“

Þór segir að fullyrðingar um að móðir hans hafi tálmað umgengni blóðföður hans við sig séu í besta falli hlægilegar. Hann segir ekki við móður sína að sakast að hann hafi ekki átt samband við blóðföður sinn á bernskuárum og hvað þá nú þegar hann sé orðinn fullorðinn maður.

Hann segir móður sína aldrei hafa talað illa um blóðföður sinn en segir teljandi á fingrum annarrar handar þau skipti sem faðirinn hafi nýtt rétt sinn til samveru við sig. Þór segist einu sinni hafa hitt föður sinn fyrir tilviljun á fullorðinsárum. Úr varð að hann átti góða kvöldstund með fjölskyldu hans en síðustu samskipti þeirra hafi verið fyrir fimmtán árum.