Færeysku öldungarnir átu Íslendingana

Sæki samantekt...

Óhætt er að segja að íslenska landsliðið hafi staðið sig vel á Norðurlandamóti öldunga, seníora svokallaðra, í sveitakeppni helgina 15.–16. mars. Allt fram að síðustu viðureign.

Mjög góðir sigrar höfðu unnist í fyrri bardögum gegn öflugum briddsþjóðum en lokaorrustan tapaðist 6–14 gegn Færeyjum og varð nokkurt högg. Færeysku öldungarnir átu í raun okkar menn og Ísland varð að láta sér duga bronssætið.

Sem voru ákveðin vonbrigði í stöðunni, því spiluð var tvöföld umferð og höfðu íslensku öldungarnir verið í efsta sætinu á Norðurlandamótinu eftir fyrri umferð.

Þeir sem kepptu fyrir hönd Íslands voru Björn Eysteinsson, Guðmundur Sv. Hermannsson, Þorlákur Jónsson, Sverrir Ármannsson, Aðalsteinn Jörgensen og Ragnar Magnússon.

Spil dagsins kom fyrir í næstsíðustu umferð gegn Finnum og kynnir til sögunnar sagnvenju, leynivopn sem byrjendur í bridds og miðlungsvanir gætu haft gagn af að kynnast.

Vestur gaf og AV voru á hættu. Eftir pass vesturs opnaði norður á grandi. Þegar Finninn sem sat í suður-sætinu gegn Íslendingum gat meldað gervisögnina 3 spaða sem sýndi báða láglitina og góð spil urðu íslenskir áhorfendur sem fylgdust með viðureigninni á Real bridge svolítið stressaðir.

Þótt punktafjöldi norðurs sé ekki mikill miðað við 15–17 punkta grand verður ekki betur séð en fjórða laufið og tvíspilið í hjarta sé nokkuð ákjósanlegt í slemmuþreifingar. Norður lét þó duga að segja 3 grönd, sem varð einnig lokasamningurinn í hinum salnum. Og þótt suður berðist áfram með fjögurra granda áskorunarsögn passaði finnski norður-spilarinn blessunarlega.

Sveit PwC varð Íslandsmeistari kvenna í sveitakeppni 2025. Spilað var í höfuðstöðvum Bridgesambands Íslands í Síðumúlanum um síðustu helgi. Í öðru sæti varð sveit HÖNNU verkfræðistofu og í þriðja sæti sveitin Tekt.