Sjúkratryggingar harma mistök

Sæki samantekt...

Sjúkartryggingar Íslands harma mistök sem áttu sér stað við útsendingu reikninga til fólks sem hafði fengið þjónustu ljósmæðra í heimahúsi.

Ljósmæðrafélag Íslands sendi tilkynningu þar sem fram kemur að reikningar hafi verið sendir til fjölskyldna sem fengu þjónustuna í stað þess að reikningar hefðu skilað sér frá Ljósmæðrum til Sjúkratrygginga.

Vinnslan stöðvuð um leið

„Sjúkratryggingar harma að fyrir mistök hafi verið sendar út upplýsingar vegna heilbrigðisþjónustu til afmarkaðs hóps þjónustuþega og heilbrigðisstarfsfólks, í tengslum við breytingu á útsendingu gagna. Vinnsla var stöðvuð um leið og málið uppgötvaðist,“ segir í tilkynningu frá SÍ.

„Vert er að taka fram að þær upplýsingar sem sendar voru sneru eingöngu að þjónustu sem þjónustuþegi hafði fengið hjá viðkomandi heilbrigðisstarfsfólki og innihéldu upplýsingar sem þjónustuþegi og heilbrigðisstarfsmaður höfðu rétt á að fá.“

Gera ráðstafanir vegna atviksins

„Sjúkratryggingar leggja ríka áherslu á öryggi gagna og líta málið alvarlegum augum. Búið er að greina hvað gerðist og gera viðeigandi ráðstafanir við útsendingu gagna til að koma í veg fyrir að slíkt geti endurtekið sig,“ segir í tilkynningu.