Sagði ná­kvæm­lega hve­nær á­rásirnar myndu hefjast

Sæki samantekt...

Talsmenn Hvíta hússins hafa síðustu daga varið miklu púðri í að gagnrýna blaðamann sem var fyrir mistök bætt inn í spjallhóp margra af æðstu ráðamönnum Bandaríkjanna. Þar ræddu þeir yfirvofandi árásir gegn Hútum í Jemen og deildu upplýsingum um árásirnar sín á milli en búið er að birta öll samskiptin úr hópnum.

Í hópnum voru varaforseti Bandaríkjanna, utanríkisráðherra, varnarmálaráðherra, þjóðaröryggisráðgjafi Hvíta hússins, yfirmaður CIA, yfirmaður allra leyniþjónusta Bandaríkjanna og sérstakur erindreki Donalds Trump gagnvart Mið-Austurlöndum, Úkraínu og Rússlands, sem var þá staddur í Rússlandi, svo einhverjir séu nefndir.

Athygli hefur vakið að Christopher Grady, aðmíráll og starfandi formaður herforingjaráðs Bandaríkjanna, var ekki í hópnum.

Þau töluðu um það hvort gera ætti árásir á Húta, af hverju, hvernig ætti að láta Evrópu borga fyrir árásirnar og hvernig ætti að gera þær. Því hefur einnig verið haldið fram að Pete Hegseth, varnarmálaráðherra, hafi deilt leynilegum upplýsingum fyrir árásirnar um hvenær þær ættu að hefjast, hvernig þær yrðu gerðar og skotmörk.

Trump-liðar hafa haldið því sérstaklega fram að Hegseth hafi ekki deilt „stríðsáætlunum“ og að því sem deilt hafi verið í hópnum hafi ekki verið leynilegar upplýsingar. Talskona Hvíta hússins hefur bent á að í grein Atlantic er talað um „árásaráætlun“ en ekki „stríðsáætlun“ og það hefur Hegseth gert einnig.

Í viðtali við Fox sagði hann alveg ljóst að engum „stríðsáætlunum“ og engum leynilegum upplýsingum hefði verið deilt.

Pete Hegseth: „Nobody is texting war plans. Well I noticed this morning, out came something that doesn't look like war plans. And as a matter of fact, they even changed the title to ‚ attack plans,‘because they know it's not war plans.“ pic.twitter.com/sJY 3 ZkIGsW]]-Aaron Rupar (@atrupar) March 26, 2025

Þeir hafa einnig ítrekað gagnrýnt blaðamanninn harðlega, þó hann hafi lítið annað gert en að vera skráður á samskiptaforritið Signal, en þjóðaröryggisráðgjafi Trumps bætti honum í áðurnefndan hóp og virðist hann ekki hafa gert sér grein fyrir hverjum hann var að bæta inn í hópinn.

Meðal annars hefur blaðamaðurinn verið kallaður úrhrak, ræfill og fúskari.

Sjá einnig: Segist bera fulla ábyrgð… en samt ekki

Atlantic hefur nú birt skjáskot af öllum samskiptum í hópnum, á þeim grunni að Hvíta húsið hefur sagt að engar leynilegar upplýsingar hafi verið send í hópnum, og kemur þar fram að Hegseth sagði öðrum í hópnum nákvæmlega hvenær árásirnar myndu hefjast töluvert áður en þær hófust.

Bæði núverandi og fyrrverandi starfsmenn i varnarmálaráðuneyti Bandaríkjanna og aðrir sérfræðingar hafa sagt fjölmiðlum vestanhafs að upplýsingarnar sem Hegseth deildi ættu klárlega að vera leynilegar.

AP fréttaveitan segir að leiðtogar varnarmálanefndar öldungadeildar þingsins hafi sent kröfu á Hvíta húsið um að málið verði rannsakað og að meðlimur ríkisstjórnarinnar mæti á fund nefndarinnar og segi meðlimum hennar ítarlega frá málinu.

Sagði nákvæmlega hvernær árásirnar myndu hefjast

Það helsta sem kemur fram í þessum nýju skjáskotum snýr að Hegseth. Að morgni laugardagsins 15. mars, dagsins sem Bandaríkjamenn hófu umfangsmiklar árásir gegn Hútum sem standa enn yfir, sendi varnarmálaráðherrann löng skilaboð á hópinn.

Þar kom fram nákvæmlega hvenær árásirnar myndu hefjast, hvenær frekari árásir yrðu gerðar og hvernig. Þetta var hálftíma áður en árásirnar áttu að hefjast og fylgdu upplýsingar um fimm árásarbylgjur yfir rúmlega þrjá klukkutíma.

Þá kom fram að fyrsta árásin yrði gerð á tiltekinn meðlim Húta og að notast yrði við F — 17 Hornet herþotur, MQ-9 dróna og Tomahawk stýriflaugar.

Pete Hegseth

TEAM UPDATE:

TIME NOW (1144 et): Weather is FAVORABLE. Just CONFIRMED w/CENTCOM we are a GO for mission launch.

1215 et: F-18s LAUNCH (1 st strike package)

1345: „Trigger Based“ F-18 1 st Strike Window Starts (Target Terrorist is @ his Known Location so SHOULD BE ON TIME)-also, Strike Drones Launch (MQ-9s)

1410: More F-18s LAUNCH (2 nd strike package)

1415: Strike Drones on Target (THIS IS WHEN THE FIRST BOMBS WILL DEFINITELY DROP, pending earlier „Trigger Based“ targets)

1536: F-18 2 nd Strike Starts-also, first sea-based Tomahawks launched.

MORE TO FOLLOW (per timeline)

We are currently clean on OPSEC.

Godspeed to our Warriors.

Skilaboðin enduðu á því að Hegseth sagði engar upplýsingar um þessar árásir hafa lekið, jafnvel þó umræðan hafi átt sér stað í samskiptaforriti sem hægt sé að hakka en vitað er til þess að Rússar hafa í það minnsta reynt það, samkvæmt heimildum AP. Varnarmálaráðuneyti Bandaríkjanna varaði við notkun Signal þann 14. mars, degi áður en árásirnar voru gerðar, vegna þess að rússneskur tölvuþrjótar væru að reyna að brjóta sér leið inn í kerfi samskiptaforritsins.

Meðlimir hópsins notuðu þar að auki í mörgum tilfellum einkasíma til að skoða og senda skilaboð í hópinn.

Svo var auðvitað blaðamaður í hópnum.

Það að Hegseth hafi sjálfur nefnt í hópnum að enginn vissi af þessum ætluðu árásum bendir til þess að hann hafi sjálfur vitað að mikilvægt væri að svo gerðist ekki.

Sérfræðingar segja ljóst að upplýsingar sem þessar ættu að vera leynilegar en Trump og ráðamenn hans segja að svo hafi ekki verið. Hvorki talsmenn Hvíta hússins né embættismenn hafa viljað segja hver svipti leyndarhulunni af upplýsingunum og hvenær það var gert.

Hrósuðu hvort öðru fyrir góð störf

Svokölluð „stríðsáætlun“ væri samkvæmt frétt New York Times mun ítarlegri en upplýsingarnar sem Hegseth deildi með hópnum. Hins vegar þykir ljóst að ef upplýsingunum hefði lekið hefði það getað ógnað lífi flugmanna og gert skotmörkum kleift að komast undan.

Skilaboðin gefa einnig til kynna að Tulsi Gabbard, yfirmaður leyniþjónusta Bandaríkjanna, hafi sagt ósatt í opnum nefndarfundi á þinginu í gær þar sem hún staðhæfði að engum ítarlegum upplýsingum um árásirnar hefði verið deilt í hópnum.

Áður en blaðamaðurinn yfirgaf hópinn sagði þjóðaröryggisráðgjafi Trumps frá því að helsta skotmark Bandaríkjamanna hefði verið í húsi kærustu sinnar og það hefði hrunið eftir árásir.

Eftir það hrósuðu þau hvort öðru fyrir góð störf og yfirmönnum CENTCOM, yfirstjórnar Bandaríkjahers í Mið-Austurlöndum.