Stjórnvöld svipta Columbia-háskóla styrkjum upp á 400 milljónir bandaríkjadala

Sæki samantekt...

Bandaríkjastjórn hefur svipt Columbia-háskóla alríkisstyrkjum vegna meintrar gyðingaandúðar. Styrkirnir eru upp á 400 milljónir bandaríkjadala, andvirði rúmlega 56 milljarða íslenskra króna.

Í yfirlýsingu frá menntamálaráðuneytinu segir að styrkirnir hafi verið afturkallaðir vegna aðgerðarleysis skólayfirvalda í ljósi viðvarandi áreitni í garð nemenda sem eru gyðingar.

Talsmaður háskólans sagði við fjölmiðilinn Axios að skólinn væri að skoða tilkynningu stjórnvalda. Skólayfirvöld heiti því að vinna með alríkisstjórninni til að fá styrkina aftur.

„Við tökum lagalegar skyldur skólans alvarlega og skiljum hversu alvarleg þessi tilkynning er. Við heitum því að berjast gegn gyðingahatri og tryggja öryggi og vellíðan nemenda okkar, kennara og starfsfólks,“ sagði í yfirlýsingu skólans til Axios.

Columbia-háskóli var þungamiðja háskólamótmæla gegn hernaðaraðgerðum Ísraels á Gaza og til stuðnings Palestínufólki. Þúsundir nemenda mótmæltu í um 140 háskólum víðs vegar um Bandaríkin. Sums staðar voru tjaldbúðir reistar á háskólasvæðum og rúmlega 2500 manns voru handtekin.

Donald Trump Bandaríkjaforseti hótaði því fyrr í vikunni að draga til baka alríkisstyrki í öllum háskólum sem hann sagði leyfa ólögleg mótmæli.