Kanada vill ekki koma til móts við Trump

Sæki samantekt...

Ríkisstjórn Kanada er ekki hlynnt því að aflétta hefndartollum sem settir voru á móti Bandaríkjunum nema öllum tollum sem stjórn Donalds Trump Bandaríkjaforseta setti í vikunni verði einnig aflétt.

Howard Lutnick, viðskiptaráðherra Bandaríkjanna, ýjaði að því á þriðjudaginn í viðtali á sjónvarpsstöðinni Fox Business að hægt væri að miðla málum í tollastríðinu og mæta Kanada og Mexíkó „í miðjunni“. Ekki er fyllilega ljóst hvað myndi felast í því en Lutnick sagði þó að það myndi ekki felast í allsherjarhléi á tollunum, heldur mögulega niðurfellingu tolla í tilteknum geirum.

Kanadískir embættismenn sögðu hins vegar við blaðið Financial Post að Justin Trudeau, forsætisráðherra Kanada, hugnist ekki að aflétta hefndartollunum í skiptum fyrir að hluta bandarísku tollanna verði aflétt. Aðeins komi til greina að aflétta þeim ef nýju bandarísku tollarnir verða alfarið felldir niður.

Trudeau kom til móts við kröfur Trumps að nokkru leyti þegar Trump kynnti fyrirhugaða tolla upphaflega með því að auka eftirlit við landamæri ríkjanna og skipa embættismann til að hafa eftirlit með smygli fentanýls yfir þau. Í staðinn var tollunum frestað um mánuð. Nú virðist Trudeau, sem áætlað er að víki úr embætti síðar í mars, ekki eins sáttafús.

„Útskýringin sem hann gefur út af þessum tollum, um fentanýl, er algjör þvættingur, fullkomlega óréttlætanleg, fullkomlega röng,“ sagði Trudeau í Ottawa. „Það sem hann vill er að sjá allsherjarhrun kanadíska efnahagsins vegna þess að þá verður auðveldara að innlima okkur.“