Össur vonsvikinn með hvað Sjálfstæðismenn leggjast nú lágt - „Skólabókardæmi um hvernig stjórnmálaflokkur á ekki að vinna“

Sæki samantekt...

Össur Skarphéðinsson fyrrverandi ráðherra er lukkulegur með Kristrúnu Frostadóttur forsætisráðherra. Hún sé stórskytta sem jafnvel Mogginn beri virðingu fyrir. Hins vegar sé nú dauft yfir Sjálfstæðisflokknum, en þingmenn flokksins hafi ekki verið flokknum eða sjálfum sér til sóma undanfarnar vikur.

Um þetta skrifar fyrrverandi ráðherrann á Facebook.

„Kristrún, sem sannarlega má kalla stórskyttu Samfylkingarinnar, heldur áfram að skora! Frá því hún varð forsætisráðherra hefur fylgið aukist um næstum þriðjung. Á meðan hefur Sjálfstæðisflokkurinn varla hreyfst, rétt mjakast upp um eitt prósent — þó laus við Bjarna og undir splunkunýrri forystu.

Ástæðan fyrir fylginu er ekki síst að Kristrún er augljós leiðtogi sem talar skýrt — og lætur verkin tala. Fólki finnst hún röggsöm enda hefur ríkisstjórn hennar rutt út stórmálum á stuttum tíma. Miklu skiptir líka að í mjög erfiðu og snúnu máli sem varðaði afsögn barnamálaráðherrans varð henni hvergi fótaskortur. Fólk virti einfaldlega hreinskilni forsætisráðherrans.

Sjálfur Mogginn getur ekki dulið virðingu sína. Þegar ný forysta flokksins réðst persónulega á Kristrúnu út af máli barnamálaráðherrans skaut Davíð Oddsson skildi fyrir hana í Reykjavíkurbréfi. Sá maður hefur óþol fyrir miklu rugli, einkum frá eigin fólki.“

Stjórnlaus þingflokkur í ófrægingarherferð

Jafnvel hlaðvörp Moggans hafi hrósað forsætisráðherra, þó að það sé gert í dulbúningi hæðni. Til dæmis var á umdeildu bjórkvöldi Þjóðmála fjallað um að Kristrún væri alltaf með allt upp á tíu. Össur segir að nafnlaus höfundur hafi í krúttlegum pistli talað um að Kristrún gæti spilað allar stöður á vellinum og líkti henni við einn ástælasta handboltamarkvörð þjóðarinnar, Björgvin Pál Gústavsson.

Það sé þó öllu daufara yfir Sjöllum. Nú sé flokkurinn kominn í „blóðlausa biðstöðu“ þar sem beðið sé eftir næsta landsfundi þar sem Áslaug Arna Sigurbjörnsdóttir og hennar stuðningsmenn muni gera aðra atlögu að formannssætinu. Á hinum vængnum bíði Guðlaugur Þór Þórðarson og hans menn tilbúnir að verja formennsku Guðrúnar Hafsteinsdóttur.

Á þingi hafi svo þingflokksformaður Sjálfstæðisflokks, Hildur Sverrisdóttir, gert hverja tilraunina á eftir annarri til að ná höggi á Kristrúnu. Til dæmis með því að væna hana um lygar og láta að því liggja að Kristrún hafi bolað Ásthildi Lóu Þórsdóttur úr ráðherraembætti.

„Ófrægingarherferð formanns þingflokksins gegn Kristrúnu er svo skólabókardæmi um hvernig stjórnmálaflokkur á ekki að vinna. Í færslu frá síðasta sunnudegi sakar Hildur Sverrisdóttur hana efnislega um að hafa logið að þinginu. Fáheyrðar persónulegar árásir af þessu tagi skilja einungis eftir óbragð hjá fólki. Þær auka hvorki virðingu né fylgi við Sjálfstæðisflokkinn.

Að sama skapi virðist þingflokkurinn stjórnlaus — enda formaður hans upptekinn við annað. Hann skandalíserar með reglulegu millibili, ýmist með gölnu málþófi um plasttappa eða hótunum um að opinbera skrá skrímsladeildar flokksins um „beinagrindur“ þingmanna annarra flokka.“

Össur tekur fram að þegar hann var í pólitík glímdi hann lengi við Sjálfstæðisflokkinn. Þá hafi Sjálfstæðisflokkurinn slegið fast frá sér en aldrei undir beltisstað. Annað eigi við í dag.

„Sjálfstæðisflokkurinn sem ég átti í höggi við í meira en þrjá áratugi sló fast — en aldrei undir belti. Andspænis þessum vinnubrögðum kemur gömul smásaga eftir Þórarin Eldjárn ósjálfrátt upp í hugann — um lífríki borðtuskunnar.

Á meðan heldur Kristrún áfram að skora.“